– Han brydde seg berre om pengane

Onsdag heldt rettssaka mot den norske tenåringen fram for alvor i Central Criminal Court i London.

Mange av dei mest alvorlege kriminalsakene i England blir ført i denne rettsbygningen.

Dei neste vekene er det altså ein 19-åring frå Norge som sit, åleine og isolert, bak glasveggane i rettssal 10. 

Han er tiltalt for «conspiracy to murder», altså for å ha vore med å planlegge eit drap i England, og risikerer i verste fall 45 år i fengsel.

– Han brydde seg ikkje

Aktor Alistair Richardson frå den britiske påtalemakta gjekk rett på sak i sin opningsprosedyre onsdag.

– Vi veit ikkje kven han skulle drepe, men som dykk skal sjå i meldingar han sende til og frå vener i Norge, så var det tydeleg at det var planen hans, sa Richardson.

Han fortalde retten at oppdraget kom frå det svenske nettverket Foxtrot. Og så la han til:

– Kvifor elles trengte han to våpen og 17 rundar med ammunisjon? Han visste ikkje, eller brydde seg ikkje, om kven han skulle drepe. Alt handla om pengane, argumenterte aktor.

Norsk 19-åring sende slengkyss i retten

«Jeg skal på crazy mission»

19-åringen nektar straffskuld. 

Interessa frå norsk og britisk presse er stor. Det er sett ut over 10 ekstra klappstolar i rettssalen for å få plass til alle.

Før retten vart sett onsdag føremiddag, snakka han med ein av dei britiske forsvararane sine gjennom glasveggen. 

Han bad om ein penn han kunne notere med undervegs.

Han blei pågripen av britisk politi på eit hotell i Huddersfield i fjor, der han altså hadde to våpen og ammunisjon på seg.

Før det har han skrive til vener i Norge at «Jeg skal på et crazy mission». 

Meldinga vart lagt fram i den britiske retten onsdag.

Mora til 19-åringen har tidlegare fortald TV 2 at ho meiner sonen var psykisk sjuk då han reiste til England i mars i fjor.

Forvaringsdom i Norge

Den norske tenåringen som rekrutterte han til det som skal ha vore eit Foxtrot-oppdrag, fekk 14 års forvaring i Sør-Rogaland tingrett denne veka.

I dommen kjem det fram at 19-åringen vart lova 270.000 norske kroner for drapsoppdraget i England.

– Han vart hindra frå å gjennomføre drapet, fordi han vart arrestert på hotellrommet i Huddersfield 19. mars. 2025, fortalde Richardson til den tolv mann store juryen i rettssalen.

– Han visste kva avtalen var

Det er dei som til slutt skal avgjera om 19-åringen er skuldig eller ei.

Vidare synte aktor fram det britane meiner er sentrale bevis i saka mot 19-åringen. I den krypterte appen Signal fekk 19-åringen ein melding frå ein brukar ved namn UnknownHustler.

Britane har identifisert mannen bak brukarnamnet. 

I meldinga får 19-åringen beskjed om at «inget kan gå fel» og at britisk politi vil bli betalt for «att se andra vägen».

Litt seinare blir han lagt til i ei gruppe der han spør «Hvem skal skytes».

– Som dykk ser, tiltalte var klar over kva avtalen var og at det handla om at nokon skulle skytast og drepast, sa aktor Richardson.

Trengde nokon som kunne gjennomføre det

Han synte også til meldingar frå «Agent47», ein høgtståande medlem av Foxtrot-nettverket som vart arrestert etter internasjonal etterlysing i vinter.

Til den forvaringsdømde 17-åringen skreiv «Agent47» «don’t force people to do it. They have to want to».

– Det er openbert at dei leita etter nokon som var dedikert til oppgåva si, nemleg å drepa nokon, og som ikkje trekkje seg i siste liten. Dette var eit drap som måtte fullførast.

I opningsprosedyren kom det også fram at 19-åringen vart stoppa i grensekontrollen på flyplassen i Manchester. 

Han hadde nødpass, ikkje returbillett, ikkje overnatting og fortalde at han skulle møte venner han hadde gama med på nettet.

Det heldt ikkje til å bli slept inn i Storbritannia. 

19-åringen vart plukka ut til detaljert intervju. Han sende melding til «Agent47», som gav råd til kva han skulle seie.

Saka blir oppdatert.