Frosta-saka: Statsadvokaten har lagt bort 15 saker

Torsdag blei det klart at bistandsadvokatane til dei fornærma i Frosta-saka vurderer å klage på at fleire av deira klientar har fått saka si lagt bort.

I etterkant bekreftar statsadvokaten at dei har lagt bort 15 av sakene dei har fått oversendt frå politiet.

Det skriv statsadvokat Eli Nessimo i ei tekstmelding til NRK.

Kan vere fleire

Tysdag blei tiltalen mot den tidlegare kommuneoverlegen i Frosta klar. Totalt 96 kvinner har status som fornærma.

Men talet på fornærma kunne ha vore høgare.

– Vi har lagt bort 15 saker på grunn av bevisets stilling, seier Eli Nessimo.

Sakene blei lagt bort etter at statsadvokaten fekk sakene oversendt frå politiet.

Nessimo fortel at talet på saker som har blitt lagt bort er høgare enn 15.

– Politiet har jo lagt bort saker før oversending til oss også.

Kor mange saker politiet har lagt bort har ikkje etterforskingsleiar Eivind Gulseth ønskt å svare på.

Vurderer å klage

Koordinerande bistandsadvokat for dei fornærma, Tove Røddesnes, sa i går at dei vurderer å klage på at saker er blitt lagt bort.

– Vi vil gjere ei vurdering av om sakene som er lagt bort skal klagast til Riksadvokaten i samråd med våre klientar, skreiv Røddesnes i ei felles pressemelding med dei andre bistandsadvokatane.

– Det er tatt ut ein alvorleg og omfattande tiltale. Det er mange som er råka, og dei aller fleste bur i Frosta kommune.