Fleirtal for dødsstraff i Israel

Det er derfor ikkje sikkert at loven blir vedtatt, skriv nyheitsbyrået Reuters.

Den israelske nasjonalforsamlinga, Knesset, har stemt for to omstridde lovforslag:

• Dødsstraff for terrordømde
• Retten til å stenge ned internasjonale medium sine kontor i Israel utan forvarsel

Begge gjekk gjennom i Knesset måndag kveld. Dette var den første av totalt fire avstemmingar som lovforslaget må gjennom før det er vedteke.

Nasjonalistisk motiverte drap

Lovforslaget om dødsstraff blei lagt fram av ein representant frå ytre høgrepartiet Jødisk Makt, Limor Son Har-Melech.

Jødisk Makt-leiar Itamar Ben-Gvir, sikkerheitsministeren i Israel, seier forslaget har som mål å avskrekke «arabisk terrorisme» og viser til angrepet 7. oktober 2023.

Han er kjend som ein av dei argaste pådrivarane for krigen i Gaza.

Forslaget inneber at personar som er dømde for dødelege terrorangrep med mål om å skade staten Israel eller med rasistiske motiv, kan få dødsstraff.

Det inneber også at militærdomstolane på Vestbreidda, der israelske offiserar utgjer dommarane, kan dømme folk til dødsstraff gjennom eit simpelt fleirtal.

I Knesset i dag stemte 39 for forslaget, 16 imot.

PLO, den palestinske paraplyorganisasjonen, fordømmer avstemminga. Talsperson i det palestinske nasjonalrådet, Rawhi Fattouh, kallar lovutkastet «ein politisk, juridisk og humanitær forbrytelse».

Avstemminga blei også kritisert av Hamas.

Kritiserte domstolar

Dei militære domstolane i Israel er skarpt kritiserte av menneskerettsorganisasjonar.

I ein rapport frå 2023, peikar menneskerettskomiteen Bar i England og Wales på at domstolane kriminaliserer eit breiare spekter av handlingar enn det folkeretten gjer.

Dei skuldar også domstolane for manglande sjølvstende og for partiskheit, og peikar på at prosessane ikkje møter internasjonale standardar for juridisk grunngiving og tilgang til juridisk rådgiving.

Vil kunne stenge ned utanlandske mediehus

Nasjonalforsamlinga vedtok også eit forslag som gir styresmaktene rett til å stenge kontora til utanlandske mediehus i Israel utan domstolsavgjerd.

Forslaget har fått namnet «Al Jazeera-lova», etter at kanalen blei stengd i Israel i 2024. Grunngivinga var at Israel meinte den Qatar-baserte kanalen som mellom anna støtta Hamas, var partisk og anti-israelsk.

Reporterar utan grenser fordømmer forslaget og seier til CNN at dette er den første spikaren i kista for uavhengige medium i Israel.