Fleire reisande lager kvalm: – Lufthamna har blitt eit stort fyllekalas

4 hours ago 2

Ei ny oversikt frå Samferdselsdepartementet viser at vald og utagerande oppførsel frå «uregjerlege passasjerar» er eit aukande problem innanfor heile samferdselssektoren.

Sidan 2022 har talet på rapporterte hendingar dobla seg.

NRK har tidlegare skrive at «ferjevettreglane» og andre haldningskampanjar ikkje har hatt ønskt effekt, og at ferjeselskapa har sett seg nøydde til å gjere grep for å verne dei tilsette frå passasjerar som lagar kvalm.

Kaibillettør og sommarvikar Simon-Emiil Bergstrøm (19) fortalde at han dagleg blei utsett for hets på ferjekaien, og at nazi-analogiane sat laust.

– Oslo lufthamn har blitt eit stort fyllekalas

På himmelkvelvingen har Luftfartstilsynet starta kampanjen #flymodus, for å auke bevisstheita blant passasjerar om «korleis ein opptrer og oppfører seg på fly».

Leiar i Norwegian kabinforeining i Parat, Rene Charles Gustavsen, meiner fylla har skulda:

– Heile Oslo lufthamn har blitt eit stort fyllekalas.

Han legg til:

– All nedbemanninga og effektiviseringa gjer at det ikkje er nok folk til å handtere trøbbelet som oppstår. Det går på sikkerheita laus.

Gustavsen etterlyser strengare kontroll og trur meir personell vil ha ein oppdragande effekt på dei som skal boarde.

– Noko av problemet er at det knapt er menneskelege kontaktpunkt før ombordstiging. Det er få personar du treng å forhalde deg til før du kjem til gata. Der står det gjerne ein einsleg tilsett – som skal sørge for at alt går ordentleg for seg.

Sjå fleire reaksjonar på tala under.

Norsk Flygerforbund
Synnøve Egeness Lilleli, leiar i Norsk flygerforbund
Vi ser på utviklinga med bekymring. For flybesetninga handlar dette om sikkerheit – ikkje berre for oss, men for alle. Problemet må takast tak i allereie før passasjerane går om bord, særleg når det gjeld alkohol og rus. Nulltoleransen til flyselskapa må følgast opp i praksis, og hendingar må få tydelege konsekvensar. Sikkerheit og respekt i kabinen er heilt avgjerande for trygg flyging.
Catharina Solli, Nowegian
Vi har nulltoleranse for denne typen oppførsel om bord. Dei siste åra har vi også begynt å rapportere hendingar som oppstår før boarding, under dette uønskt åtferd ved innsjekk og i gate retta mot våre tilsette i bakketenesta. Dette har medført ein auke i talet på rapporterte tilfelle. I tillegg til å melde sakene til Luftfartstilsynet blir fleire av hendingane melde til politiet.
Camilla Walla / Avinor
Camilla Walla, Avinor
Vi jobbar aktivt for å bevisstgjere reisande og redusere hendingar med dårleg oppførsel. Det skal vere trygt for våre og våre partnarars tilsette å gå på jobb, og vi har nulltoleranse for truslar og vald. Alvorlege hendingar blir alltid politimelde. Samtidig er vi opptatte av at alle reisande skal få ei god oppleving, noko som føreset at reglane blir følgde og at alle opptrer omsynsfullt.
Stian Lysberg Solum / NTB
Rene Charles Gustavsen, leiar i Norwegian kabinforeining i Parat
Tilsette på flytoget og vektarane i sikkerheitskontrollen opplever det same som oss, så dette er eit openbert problem. Eg er glad for kampanjen til Luftfartstilsynet. Det er ei anerkjenning av problemet med uregjerlege passasjerar – og gjer at vi som jobbar om bord i flyet kjenner oss sett og høyrt. Og ikkje minst er det viktig for flysikkerheita og for reisekomforten til alle passasjerane.
Mads Kristiansen / Vy
Siv Egger Westin, kommunikasjonssjef Vy tog
Dette er ein trend i samfunnet som er urovekkande. Vi tok derfor initiativ til eit samarbeid med Politiet og Bane Nor, for å sjå på tiltak for å redusere talet på hendingar med vald og truslar om bord i toga våre. Det har blitt gjort mange tiltak i etterkant av dette, som fleire vektarar og politi på stasjonane og i toga. Vi vil fortsette å jobbe med tiltak for å førebygge denne typen hendingar.
Eva Paulsen, Informasjonsansvarlig SJ Noreg AS
Personalet vårt er godt trena i å handtere slike situasjonar og til å førebygge eskalering. Vi gjennomfører jamleg kursing og etteropplæring. SJ Noreg ser svært alvorleg på alle former for vald eller uønskt åtferd, og vi har eit godt samarbeid med politiet, som hjelper oss når det er behov. Vi også har gode ordningar for oppfølging av personalet som kan ha blitt utsett for uønskte hendingar.

Før jul lanserte det amerikanske transportdepartementet kampanjen The Golden Age of Travel Starts With You i eit forsøk på å gjenreise folkeskikken i lufta («return to civility in the skies»).

Kampanjen blei i sin tur kritisert for å spele på førestillinga om ein tidlegare gullalder («Make travel great again») der alle reisande oppførte seg eksemplarisk.

Bildet viser en gruppe passasjerer ombord på et fly fra midten av 1900-tallet. Flere kvinner og menn sitter i setene, iført formelle klær, mens en flyvertinne interagerer med en familie. Omgivelsene inkluderer typiske flyseter og interiørdesign fra denne perioden. Under bildet er sitatet fra Transportminister Sean Duffy om kleskode på flyplasser.

Regjeringa: – Ei utfordring som må takast på alvor

Samferdselsminister Jon-Ivar Nygård forklarer delar av auken med at fleire hendingar blir rapporterte, men understrekar at han ser «svært alvorleg» på det han karakteriserer som «eit aukande problem».

– Forstyrrande oppførsel og vald i transportsektoren er uakseptabelt, både av omsyn til dei tilsette som utfører viktige samfunnsoppgåver, og til reisande som har krav på trygg og sikker transport.

Han legg til:

– Tala viser at dette er ei utfordring som må takast på alvor på tvers av transportformene. Eg vil følge utviklinga tett og sjå til at myndigheitene i samferdselssektoren fortset arbeidet for førebygging, rapportering og oppfølging av denne typen hendingar.

En person står i fokus og gestikulerer med hånden. I bakgrunnen er det en avgangstasjon med opplyste skilt. Omgivelsene virker travle, typisk for en flyplass. Det er høy belysning, og informasjonsskiltene viser avgangstider.

Høgre: – Kan ikkje akseptere at tilsette har ein så ugrei jobbkvardag

Oversikta over uregjerlege passasjerar kom på oppfordring frå medlem i transportkomiteen på Stortinget, Anne Kristine Linnestad (H).

Ho karakteriserer tala som «heilt uakseptable».

– Vi kan ikkje akseptere at tilsette i denne sektoren har ein så ugrei jobbkvardag. I tillegg går det utover trafikksikkerheita.

– Kva kan myndigheitene gjere, anna enn å be folk skjerpe seg?

– I første omgang kan vi legge til rette for mindre køar i innsjekkingsskranken, og stoppe rusa passasjerar før dei kjem til gate. Politiet forhindrar ugreie hendingar på lokaltoget mellom Ski og Oslo. Kanskje vi må gjere meir av det.

– Har du tillit til at samferdselsministeren går inn i dette på samvitsfullt vis?

– Eg synest han er litt for tilbakelent.

– Så eg håpar han tar tala og hendingane inn over seg, og verkeleg tar tak. Han kan begynne med å bidra til at vi får ein offentleg debatt. Det kan vere haldningsskapande i seg sjølv.