Fleire jenter i teknologibransjen: – Det er inspirerande

– Eg tenker at det betyr mykje for jenter å sjå kva vi driv med her. Det er viktig for å få fleire jenter i industrien, seier Astrid Værholm.

18-åringen er nytilsett lærling hos offshoreselskapet Nymo i Grimstad.

I løpet av fem år har kvinneandelen hos bedrifta auka frå fem til 14 prosent.

Talet på jentelærlingar på Teknologi- og industrifag på vidaregåande skole i landet har også auka med nesten 70 prosent sidan 2021.

Det viser tal frå Utdanningsdepartementet.

Værholm går saman med ein jentegjeng frå Holviga ungdomsskule på bedriftsbesøket Jenter og Teknologi. Denne gongen i ei ny rolle.

Målet er å inspirer jenter og vise fram kva slags moglegheiter dei har innan teknologibransjen.

For fire år sidan var ho ein del av ungdomsskulegjengen frå Holviga på besøk.

– Det er nostalgisk. Nå går eg saman med læraren eg gjekk med første gong eg var her, seier Astrid Værholm.

Tiltak for å auke kvinneandelen

Det er fjerde året Nymo har bedriftsbesøk av jenter.

HR-praktikant Thea Elisabeth Andresen meiner at besøksdagar hos bedrifta er ein av fleire grunnar til at kvinneandelen har auka.

– Vi får vist kva vi gjer og kva moglegheiter jenter har. Samtidig har vi også mange rollemodellar, som viser at det er mogleg.

Andresen fortel at dei har jobba aktivt for å sørge for ein attraktiv arbeidsplass for kvinner.

– Vi har eit internt fokus på å fremje samhaldet blant oss kvinner, og arrangerer lunsj og sommarfestar for berre damene, seier ho.

Inspirerte elevar

Lærling Astrid Annie Værholm blei sjølv inspirert da ho var på besøk for første gong.

– Eg blei nysgjerrig på kva dei driv med, også fekk eg ei god forklaring. Det var også veldig gøy å vere her med klassen og bygge tårn som dei også skal i dag, seier ho.

Elevane ved Holviga ungdomsskule Helene Tobiassen Kjøsterud og Johanne Sundbø Tangen fortel at lærling Astrid Annie har gjort inntrykk.

– Ho har jo veldig kontroll og verkar veldig flink. I tillegg gjekk ho på den skolen vi går på nå, så det er inspirerande, seier Tangen.

sjølv om Kjøsterud ikkje er sikre på framtidas jobb synest ho dagen har vore fin.

– Det er mange spennande maskiner. Eg veit ikkje heilt om det er noko for meg, men eg kunne gitt det ein sjanse.

Mangfald i industrien

Anne Klepstad er seniorrådgivar i NHO Agder. Ho fortel at eit mangfald i ein industri som tradisjonelt er mannsdominert er viktig.

– Der er Nymo eit godt eksempel. Å ha bedriftsbesøk er berre eitt av fleire tiltak. Det er ekstra gøy å møte ei jente som var her for fire år sidan og i dag er lærling. Det tenker eg er inspirerande, seier ho.