Fleire bustader umoglege å bu i etter rekkehusbrann

Naudetatane rykte ut etter melding om brann i rekkehus ved Sandved i Sandes. Meldinga kom ved 04.30-tida.

To timar seinare seier brannvesenet at dei har kontroll. Men fleire bustader er umoglege å bu i på grunn av skadane.

– Det er nå folk som får hjelp frå Sandnes kommune for å finne ein stad å bu, seier politiet sin innsatsleiar på staden, Stian Sandved.

Fleire evakuerte – «kaotisk og opne flammar»

Bebuarar i leilegheita kor det starta å brenne, blei evakuerte. Alle er gjort greie for, opplyste politiet klokka 05.05.

– Det er meldt om full fyr i ei av leilegheitene, sa operasjonsleiar Håkon Lokna i Sør-Vest politidistrikt til NTB.

Også leilegheitene som ligg i nærleiken blei evakuerte, opplyste politiet.

– Det var full fyr på utsida og fare for spreiing, seier brannvesenet sin innsatsleiar på staden, André Jacobsen.

Han seier det tok fyr i taket. Da må brannvesenet rive opp for å få kontroll.

– Det var kaotisk, opne flammar og mykje røyk, seier Jacobsen om det som møtte brannvesenet da dei kom til staden.

– Tre av bustadene ser ut til å vere umoglege å bu i, skriv Lokna på politiet sin meldingsteneste like før klokka 06.30.

Veg stengd

Da NRK kom til staden rundt klokka 05.30, var det er ei stor samling med politi og brannvesen i området.

Det var stor røykutvikling frå rekkehusbrannen. Rett før klokka 06 var det framleis mykje røyk i området, men nærmare 06.30 var mykje borte.

Politiet oppmodar likevel personar som kjenner ubehag, om å kontakte helsevesenet.

Ein veg i området, hovudvegen fylkesveg 44, var stengd på grunn av brannen. Sandved ligg sør for Sandnes sentrum. Vegen opna igjen rett før klokka 07.