Flaum av skademeldingar etter ekstremvêret «Amy»

«Amy» førte til storm og flaum i store delar av Sør-Noreg i starten av oktober. Trøndelag, Vestland, Rogaland og Vestfold fekk hardast medfart.

Ekstra mange skadar er melde inn frå kommunane Oppdal, Bergen og Larvik.

Lause takplater, heile tak og garasjar som er tekne av vinden og tre som har treft bygningar, er typiske skadar. Fleire verksemder og næringsbygg fekk også store skadar.

– Dette var ei omfattande naturskadehending med betydeleg skade på eit unormalt stort geografisk område, seier administrerande direktør Ståle Solem Ingebrigtsen i Norsk Naturskadepool.

Førebur seg på meir ekstremvêr

Nye anslag frå ordninga Norsk Naturskadepool viser at ekstremvêret «Amy» førte til rundt 15.000 naturskadar på bygningar og innbu, og erstatningar på 1,8 milliardar kroner.

I tillegg til naturskadane, kjem blant anna skadar på bilar, båtar og vasskadar, som blir dekte av andre forsikringsordningar.

Tryg Forsikring har fått inn 3.638 skademeldingar i samband med «Amy», der litt over halvparten er sende vidare til naturskadepoolen. Bergen toppar lista, med 537 skadar.

Kommunikasjonsrådgivar Torbjørn Brandeggen må leita langt tilbake for å finna tilsvarande tal.

– Det har kome inn nesten dobbelt så mange skademeldingar som under ekstremvêret «Hans». Me må heilt tilbake til nyttårsorkanen i 1992 for å i heile teke vera i nærleiken av same omfang som under «Amy».

Skademeldingane gjeld i stor grad vindskadar på bygningar, og at kledning og tak har losna. Stort sett gjeld det privateigde bygningar.

I tillegg har gjenstandar treft både bilar, båtar og hus. Tryg Forsikring har registrert nesten 300 skadar på bilar.

Fleire store naturskadehendingar på få år

Fleire enn 100.000 mista også straumen under «Amy». Ifølgje Telenor var det det største kraftutfallet på ti år.

– Det er ingen tvil om at me må forhalde oss til meir ekstremvêr, og førebu oss på meir. Det går blant anna på korleis me modellerer venta effektar av klimaendringane framover, og kva det vil ha å seia for framtidig skadeomfang, seier Ståle Solem Ingebrigtsen i Norsk Naturskadepool.

Han viser til at det har vore ein auke i talet på naturskadar dei siste ti åra, og fleire av dei største naturskadehendingane har skjedd dei siste tre-fire åra.

Nye anslag på «Hans»

Norsk Naturskadepool har også kome med oppdaterte anslag etter ekstremvêret «Hans», som herja særleg dalføra Hallingdal, Gudbrandsdalen og Valdres i august 2023.

Det er oppjustert til å kosta 3,1 milliardar kroner, og er det mest kostbare ekstremvêret sidan ordninga med naturskadepool blei innført.

Talet gjeld skadar på bygningar og innbu etter naturskadeforsikringslova.