Fjernstyrt koffert skal redde liv når sekunda tel

Tenk deg kjensla.

Du hamnar i ein situasjon der kompisen din, eit familiemedlem eller ein totalt framand person plutseleg blir akutt sjuk.

Enten det er snakk om eit hjarteinfarkt, ein allergisk reaksjon eller eit alvorleg astmaanfall - dei aller færraste av oss går rundt med dei nødvendige medisinane.

Nå håpar ein at ein innhaldsrik koffert skal kunne hjelpe både deg og pasienten i ein tidskritisk situasjon.

Blir låst opp av AMK

Aidency 113kit er namnet.

Den kvite og turkise førstehjelpskofferten blir prøvd ut av såkalla akutthjelparar fleire stader i landet, blant dei Røde kors og Redningsselskapet i Vestfold og Telemark.

– På sikt håpar vi ho også kan finnast på kjøpesenter og andre stader, seier Svein Olav Steinholt.

Han er leiar i Larvik Røde Kors, som testar kofferten i desse dagar, og er så langt veldig positiv.

Kofferten inneheld blant anna reseptbelagde medikament som kan vere livreddande. Dette er ikkje Røde kors-mannskap utstyrte med i dag.

Behaldaren kan berre opnast ved at ein 113-operatør låser opp boksen via fjernstyring.

Deretter skal kven som helst på staden kunne gi rett medisin til pasienten, etter grundig rettleiing over telefon frå operatøren hos AMK.

– Lovande

Jon Erik Steen-Hansen er overlege ved AMK-sentralen i Vestfold og Telemark.

Han synest oppfinninga verkar lovande, og har saman med resten av leiinga gitt grønt lys for utprøving av kofferten i distriktet.

– Av og til er vi for langt unna. Vi trur og veit at vi kan vinne tid med dette i nokre situasjonar, men det må testast så vi veit at vi får det til i praksis, seier han til NRK.

Han understrekar at brukaren som er i kontakt med 113 får beskjed om korleis medisinane skal brukast rett.

– Er det ikkje ein fare for feilbruk, når det ikkje er helsepersonell som utfører dette fysisk?

– Teoretisk sett, ja, men det er bygd inn mange sikkerheitsmekanismar. Det er operatøren som tar avgjerdene, forsikrar han.

– Er det noko i denne boksen som kan vere attraktivt for rusmisbrukarar?

– Nei. Her er det ingen attraktive stoff på gatenivå. Det er verken smertestillande eller roande middel.

Kofferten blir også testa hos AMK Møre og Romsdal i disse dagar.

Spent

Mannen bak produktet, Trond Lauritsen, har sjølv opplevd å komme som førstemann til ein skadestad.

– Eg blei ståande med 113 på telefonen, og observerte personen framfor meg bli sjukare og sjukare utan å kunne gjere noko, fortel han.

– Eg fekk ein ekstrem hjelpetrong og kjensla av ei avmakt over å ikkje kunne gjere noko mens eg venta. Det var ein situasjon eg ikkje kunne akseptere.

Seinare har Lauritsen brukt mykje tid og ressursar på å utvikle produktet, som han nå håpar kan bli eit vanleg syn over heile landet.

– Den er godkjent for bruk av hvermansen. Nå håpar vi han hamnar på veggen ved sida av hjartestartarar i bedrifter og verksemder, seier Lauritsen.