Fekk ikkje synge – slo til vakta

Stemninga blei amper då ein mann i 50-åra og fleire familiemedlemmer møtte opp på karaokestaden «Syng Mer» i Oslo i mars i år. 

Dei hadde booka karaoke-tid på utestaden, men blei avvist i døra av ein vektar som meinte mannen var for rusa til å sleppe inn. 

Det syntest mannen i 50-åra lite om, i følgje ein dom frå Oslo tingrett. 

– Uprovosert 

Det oppstod ein diskusjon mellom vektaren og mannen, som var både ueinig og misfornøgd med avgjerda om at han ikkje fekk komme inn og synge karaoke denne kvelden.  

Vektaren har forklart at han måtte dytte vekk og halde tiltalte unna seg under diskusjonen.

AMPERT: Det blei diskusjonar mellom mannen og vektaren utanfor utestaden. Foto: Aleksander Myklebust / TV 2

Etter at familiemedlemmene hadde vore inne og fått tilbake pengane frå bookinga, forsøkte dei også å dra den hissige mannen med seg vekk frå karaokeplassen. 

I staden slo han vektaren i ansiktet med knytt neve. 

Heile hendinga blei fanga på eit overvakingskamera. 

«Retten er etter bevisføringa og overtydd om at tiltalte slo bevisst og at slaget var retta mot fornærma sitt ansikt,» står det i dommen frå Oslo tingrett. 

Retten meiner slaget må reknast som uprovosert, sjølv om det var eit visst opphav til valdsutøvinga ved at fornærma hadde nekta mannen å komme inn på karaokestaden. 

– Har ingen forklaring 

Mannen sjølv har gitt ei tilståing utan atterhald. Han beklagar sterkt og har forklart at han er svært fortvila over hendinga. 

Han seier han har ingen forklaring på kvifor han skulle bli så hissig, og skildrar eigen oppførsel som atypisk og som ein karakterbrist. 

Han viser sjølv til at han hadde eit altfor stort alkoholinntak og at han hugsar lite av omstenda rundt hendinga.

Julebordet med jobben endte i retten

I straffeutmålinga blir det vist til at strafferamma for kroppskrenking er bot eller fengsel i inntil eitt år, og at knyttneveslag mot hovudet har eit betydeleg skadepotensial.

Forsvararen til mannen har bedd om at straffa kan gjerast på vilkår, altså med prøvetid, ettersom mannen ikkje har vore straffa tidlegare, at hendinga ikkje er typisk for hans oppførsel og fordi ei fengselsstraff vil ramme han hardt.

Fleirtalet i retten meiner derimot at allmennpreventive omsyn ved denne typen vald veg tyngst. 

Mannen må difor sone 18 dagar i fengsel etter den mislukka karaokekvelden. 

TV 2 har tatt kontakt med forsvararen til mannen, som ikkje ville kommentere dommen.