Fastlegekontoret etter Lineas (14) død: – Djupt tragisk

Fastlegekontoret i Bergen uttrykker si medkjensle etter 14 år gamle Linea Solheim Hjortland døydde på Haukeland sjukehus 30. september.

Dødsårsaka var hjernedød som følge av blodpropp og hjartesvikt.

Foreldra meiner utfallet kunne vore annleis, dersom helsetenesta ikkje hadde hengt seg opp i dottera sin historikk med angst.

No har dei meld Bergen legevakt til politiet.

Både legevakta og fastlegekontoret til Linea er under gransking av Statsforvaltaren.

Foreldra fortalde si historie til NRK denne veka:

Kjenner seg svikta av helsetenesta

Mor Sarah Solheim Hjortland og far Tommy Hjortland har meldt Bergen legevakt til politiet etter bortgangen til dottera.

Dei kjenner seg svikta av legevakta, men har også retta kritikk mot fastlegekontoret.

Dagleg leiar ved det aktuelle fastlegekontoret i Bergen uttrykker no si medkjensle, og skriv følgande til NRK:

– Dødsfallet er djupt tragisk. Ei ung jente er død og mi største medkjensle går til alle råka. Eg vil ikkje uttale meg i ei pågåande tilsynssak, men kan forsikre om at all dokumentasjon vil bli oversendt tilsynsmyndigheitene. Utover dette har eg ingen kommentarar.

Ifølge mora var Linea til fastlegekontoret med pustevanskar to gongar i løpet av september.

• Første gongen skal legen ha konkludert med at plagene var angstrelatert, utan å undersøke Linea fysisk.
• Den andre gongen skal ein anna lege ha gjort fleire fysiske undersøkingar, men framleis konkludert med at plagene var angstrelaterte.

Dei to neste dagane vart pustevanskane forverra og foreldra tok Linea med på legevakta begge dagane.

Foreldra meiner dei ikkje dei blei tekne på alvor før Linea fekk hjartestans på legevakta. Dottera vart frakta til Haukeland sjukehus i ambulanse. To dagar seinare vart ho erklært død.

Statsforvaltaren granskar saka

Haukeland universitetssjukehus varsla Statens helsetilsyn om hendinga 1. oktober, og Statsforvaltaren oppretta tilsynssak mot Bergen legevakt og det aktuelle fastlegekontoret 16. oktober.

Statsforvaltaren arbeider no med å hente inn journaldokumentasjon frå dei involverte.

Bergen legevakt vart meld til politiet av foreldra 4. november.

Inntil Statsforvaltaren er ferdig med si gransking, vil ikkje politiet gjera noko, opplyser Trygve Ritland, påtaleansvarleg i Vest politidistrikt.

– Når Statsforvaltaren er ferdig med si gransking, vil dei gi ei tilråding på om politiet skal etterforske saka vidare eller ikkje, seier Ritland.

Familien sin bistandsadvokat, Siren Iren Preto, seier at foreldra melder saka til politiet for at andre skal sleppe å gjennom ei liknande hending.

– Det er rett og slett for å hindre at noko slikt skjer igjen. Og verkeleg vise kor alvorleg vi ser på denne hendinga.

NRK omtalte først saka 17. oktober: