Fann telefon og mystisk lapp på do – nå er stjerna utestengd i tre år

– Dette er den beste spelaren som nokon gong er tatt for juks, seier Kristoffer Gressli, NRKs sjakkekspert.

Det har gått fem månader sidan nyheita om Kirill Sjevtsjenko sende sjokkbølger gjennom sjakkverda.

Den ukrainskfødde rumenaren vart tatt på fersk gjerning på eit toalett under den spanske klubbmeisterskapen.

No har stormeisteren, som var nummer 69 på verdsrankinga, fått straffa si: Det internasjonale sjakkforbundet (Fide) har utestengt han i tre år.

Medan ein ventar på resultatet av etterforskinga har 22-åringen allereie vore utestengd i fem månader.

– Straffa er altfor mild

Den rumenske sjakkprofilen kan dermed vere tilbake ved brettet i oktober 2026.

– Eg tenker at straffa er for kort. Juks er den største trusselen mot sporten. Fide burde statuert eit eksempel og stengt han ute lenger enn dei tre åra, seier Gressli.

Han får støtte av Noregs nest beste spelar, Johan-Sebastian Christiansen.

– No trur eg ikkje veldig mange turneringar ønsker å ha han med, men eg synest uansett at straffa er altfor mild, seier Christiansen til NRK.

I avgjerda til Fides etikk- og disiplinærkommisjon kjem det fram fleire nye detaljar om korleis juksinga gjekk føre seg.

Kristoffer Gressli nærast ler når han gjenfortel kva som møtte sjefdommaren på toalettet i spellokalet.

• NRK har prøvd å få ein kommentar frå Sjevtsjenko, men har førebels ikkje lykkast.

Dette stod på lappen

Fleire blei nemleg mistenksame på 22-åringen fordi han gjekk så ofte på do under turneringa.

Fide skriv at det blei funne ein telefon og ein handskriven lapp, der det stod følgande på spansk:

«Ikkje rør! Telefonen er lagt igjen til ein gjest som skal svare på natta!»

Sjefdommaren beordra deretter arrangøren til å låse toalettet for å sjå om nokon ville «returnere til doen for å bruke telefonen».

«Stormeister Sjevtsjenko blei observert medan han prøvde å få tilgang til det låste toalettet, utan hell, og brukte deretter ikkje ein do som var ulåst», skriv Fide.

Sjakkprofilen har i forklaringa si innrømt å ha gøymt ein telefon på toalettet. Han hevda at han brukte telefonen til å få tilgang til sjakkplattforma Lichess, men han nektar for å ha juksa «effektivt» og at handlingane hans hadde nokon innverknad på spelet hans.

Han har fortalt at han «ikkje fekk utført juksinga».

Under Fides etterforsking vart det ikkje funne avvik i partia hans som kunne tyde på effektiv juks.

– Lavpanne-juksing

Gressli ristar på hovudet av heile saka.

– Dette er det endelege beviset på at sjakk og intelligens ikkje kan koplast saman. Det er så lågpanne-juksing som du får det, seier Gressli.

Fides etikk- og disiplinærkommisjon skriv også at dei finn det formildande at han har innrømt feil, vist anger, har samarbeidd – og at han har fortalt om ei svekt mental helse, blant anna grunna drapstruslar.

– Når ein først ønskte å jukse, skulle ein tru at ein gjorde det på ein litt «betre» måte. Han gjorde det jo rimeleg openbert, seier Christiansen og legg til:

– Det er utruleg godt å sjå at han vart tatt, og eg håpar han aldri kjem tilbake til sjakken.