Elkem stansar all produksjon ved to fabrikkar i nord: – Straumprisane er altfor høge

På fredag stansar Elkem ASA produksjonen mellombels ved verka sine i Salten og Rana i Nordland.

Totalt er det 375 tilsette der.

Produksjonsstansen omfattar tre omnar i Salten og to i Rana.

– Vi har berre dei to store omnane som produserer ferrosilisium, og desse blir stoppa. Dermed blir all produksjon stansa på Elkem Rana.

Det seier verksdirektør i Elkem Rana, Frode Berg.

Selskapet opplyser at tiltaket kan føre til mellombelse permitteringar av tilsette.

Berg seier at ein god del av dei tilsette i Rana kan bli ramma av dei varsla permitteringane.

– Når vi tar ut begge omnane som produserer materialet vårt, så er det openbert at det vil få konsekvensar for mange av våre tilsette, seier Berg.

Verket i Rana produserer ferrosilisium, som er eit kritisk råmateriale for stålindustrien. Ved Salten blir det produsert i hovudsak silisium, som blir brukt i alt frå keramikk og batteri til aluminiumslegering.

Hovudtillitsvalt ved fabrikken i Salten, Jan Harald Karlsen seier at dei har merka at noko var på gang.

– Vi er kjente med at marknaden er vanskeleg, så det kom ikkje som ei overrasking, men vi hadde håpa at vi skulle unngå dette.

Høge straumprisar og toll

Årsaka er krevjande marknadsforhold, høge lagernivå og høge straumprisar.

– Vi er i ein marknad som er veldig krevjande. Vi har ei høg lagerbehaldning av ferrosilisium i Europa og vi har ikkje tilstrekkeleg volum for å selje dei produkta vi har, seier Berg i Rana.

Geopolitisk, med tollbarrierar, gjer heller ikkje ting lettare.

Dei hadde eit håp om at tollen ville gi auka prisar på ferrosilisium, og det har det gjort i Europa, men utfordringa er at det ikkje er tilstrekkeleg volum i marknaden for å selje, legg Berg til.

I tillegg opplever dei veldig høge straumprisar for tida, noko som ikkje gjer situasjonen betre.

– Straumprisane vi har i dag, er over det nivået som vi er i stand til å produsere på.

Når dei har ein svak marknad i Europa, så må dei sjå på andre marknader andre stader, ifølge Berg.

– Og der er det utfordringar med å få selt materialet til akseptable prisar. Det betyr at straumprisane er altfor høge for å forsvare vidare drift til dei marknadene.

– Kjem sterkt tilbake

Det er usikkert kor lenge stansen vil vare, seier Berg.

– Vi håpar at vi vil sjå effekt av at marknaden snur, og at vi då kan komme i gang med produksjon og få alle tilsette tilbake på jobb. Men det er framleis usikkert kor lenge dette vil vere nødvendig å ta ut produksjon.

Verksdirektør ved Elkem i Salten, Ove Sørdahl seier at det stansen er alvorleg, men at dei planlegg å komme sterkare tilbake.

– Vi planlegg å stanse for ein liten periode, men planen er å komme sterkt tilbake, seier han og legg til:

– Vi er i ein bransje som går opp og ned, og akkurat no går det ned, men vi kjem tilbake igjen.