Dømd til livsvarig fengsel i Finland

Yan Petrovskiy (36) er ein russisk statsborgar, og budde i Noreg mellom 2004 og 2016. Han blei utvist fordi norske styresmakter meinte han var ein fare for rikets sikkerheit.

Han er ein del av den berykta gruppa «Ruisch», som har kriga på russisk side i Ukraina. Petrovskiy går under kallenamnet «Nordmannen», og har brukt fleire norske og norrøne symbol og referansar.

Han har tidlegare fortalt at han har kjempa i Ukraina. Etter at Russland annekterte Krym i 2014 skal han ha reist mellom Noreg og Ukraina, der han deltok i kampar aust i landet saman med prorussisk milits.

Fredag blei Petrovskiy dømd til livsvarig fengsel i Finland for krigsbrotsverk gjort i Ukraina i 2014 og 2015. Ein livstidsdom i Finland svarar til 12 år i forvaring i Noreg. Etter at dei 12 åra har gått, kan han be om å bli sett fri på prøve.