Dømd for bildrap – veit ikkje kvifor han hamna på feil side

Det var i juli 2023 at bilen hans kom over i motsett køyrefelt og trefte ein annan personbil i fronten. 

Ulukka skjedde på E39 langs Hornindalsvatnet, mellom Nordfjordeid og Stryn.

Den kvinnelege sjåføren i bilen som vart treft vart hardt skadd i ulukka. Den mannlege passasjeren i 50-åra omkom.

No er ein mann i 20-åra dømd for aktlaust bildrap. Han køyrde den svarte BMW-bilen som kom over i kvinna sitt køyrefelt.

«Hva gjør jeg»

Sjølv hugsar han ikkje kvifor han kom over i feil køyrefelt, kjem det fram i dommen frå Sogn og Fjordane tingrett.

Han hugsar ikkje noko av verken ulukka eller tida like før.

Ulukkesgruppa til Statens vegvesen har granska frontkollisjonen. Dei fann ikkje skrense- eller bremsespor på staden. 

Den kvinnelege sjåføren har forklart at ho kunne sjå bilen til tiltalte i 2–3 sekund før det small. 

Plutseleg kom den over i hennar køyrefelt og ho rakk tenke «hva gjør jeg».

KRAFTIG KOLLISJON: Det er ikkje mistanke om høg fart, men i 80-sona blir ein frontkollisjon likevel kraftig. Foto: Politiet

Dette meiner retten skjedde

I retten nekta mannen i 20-åra straffskuld for aktlaust bildrap, men forklarte at han «følte stor skuld for ulukka og at det ikkje gjekk ein dag utan at han tenkte på denne».

Den aktuelle dagen var han på veg tilbake til byen han studerte i. Han hadde sove godt og følte seg opplagt. Han har ikkje sjukdommar som epilepsi eller diabetes som kunne forklara kvifor han brått kom over i feil køyrefelt.

Tekniske undersøkingar viser at han heller ikkje var oppteken med mobilen sin. Rus er heller ikkje eit tema.

Forsvararen til mannen argumenterte for at oljesøl i vegbana, observert av ein brannmann, kan ha vore årsaka til at bilen kom over i feil køyrebane.

Det ser retten vekk frå. 

Dei legg til grunn at årsaka til ulukka anten er at «tiltalte sovna, var uoppmerksam under køyringa eller feilfordelte merksemda si».

Må i fengsel

Mannen i 20-åra er dømd til 60 dagar fengsel for aktlaust drap og kroppsskade.

Halvparten av straffa er på vilkår, altså må mannen i fengsel i 30 dagar.

– Dei etterlatne fekk på tragisk vis rive bort ein av sine næraste. Kvinna fekk store skader som ho både fysisk og psykisk vil måtte ta med seg vidare i livet, skriv tingretten.

Mannen må også klare seg utan lappen i tre år og må betale 100.000 kroner i erstatning til kvinna.

Det var avisa Fjordingen som omtala dommen først. Det er ikkje kjent om mannen ankar og dommen er difor ikkje rettskraftig enno.