Digital teneste skal få ned ventetida

Det skal ei gruppe studentar no sjå om dei kan gjere noko med.

– Det er ei nasjonal utfordring. Vi må få fart på plan- og byggesaksbehandlinga for at vi skal kunne bygge dei bestilte bustadene i landet, seier Venke Moe.

Ho er plan- og bygningssjef i Kristiansand kommune.

23 studentar frå Universitetet i Agder (UiA) skal dette semesteret samarbeide med kommunen for å utvikle digitale tenester som skal forbetre byggesaksprosessen.

– Tenesta skal hjelpe oss slik at prosessen med saksbehandling går raskare, seier Moe.

Kommunen har tett samarbeid med Direktoratet for byggkvalitet.

Det er eit felles mål å gjere søkeprosessar lettare for både publikum og saksbehandlarar.

Nasjonal satsing

Ein av studentane som skal vere med å utvikle tenestene er Ole Bjørk Olsen.

– Basert på det vi har høyrt, er det lange tider på saksbehandling. Spesielt for plan og bygg, seier han.

Tenesta dei jobbar med skal blant anna gi lettare informasjon om kva som er lov.

Då er det viktig å kartlegge korleis tenesta kan bli brukarvennleg.

Eit eksempel kan vere ein søkar utan teknisk kompetanse som ønsker å bygge ein garasje på eigedommen sin.

– Søkaren kan møte på fleire utfordringar enn ein som kanskje har meir tekniske ferdigheiter, forklarer student Henrik Sæverud Lorentzen.

Studentene Ole Bjørk Olsen og Henrik Sæverud Lorentzen er klar for et semester utenfor universitetet. Foto: Marit Henriette Gustavsen

Frå 12 veker til minutt

Rådgivar for digitalisering i KS, Heidi Liv Tomren, heiar på samarbeidet i Kristiansand.

Ho håpar på meir automatiserte løysingar i framtida med kortare responstid.

– Søkaren kan få ein SMS etter berre nokre minutt med:«søknaden din er godkjent», seier ho som eit eksempel.

Tomren meiner det trengst slike tenester for å avlaste kommunane.

– Arbeidet kommunane gjer med førespurnader frå privatpersonar er veldig tidkrevjande, seier ho.

Unikt samarbeid

Samarbeidet er unikt på landsbasis.

– Nye, unge hovud tenker annleis enn vi som har jobba med dette lenge. Samarbeidet er heilt fantastisk, seier plan- og bygningssjef Venke Moe.

Hallgeir Nilsen er førstelektor ved UiA og organiserer studieprogrammet.

– Bedriftene er modige. Dette motiverer og skjerpar studentane. Plan og bygg i Kristiansand kommune er ein av våre aller viktigaste samarbeidspartnarar.

Kontorkvardag

Studentane hadde nyleg sin første arbeidsdag i kommunen.

Gjennom heile våren skal studentane jobbe med prosjektet på heiltid.

Å komme ut frå studiekvardagen til jobbkvardag kan vere ein overgang for mange, men studentane er motiverte.

– Det blir heilt fantastisk. Eg kjem ut i arbeidslivet med litt erfaring, seier Henrik Sæverud Lorentzen.