Christiansen med Bakken-gest etter spurtsiger

Vetle Sjåstad Christiansen var sterkast på den siste runden og gjekk frå franske Éric Perrot i stafetten i Oberhof.

Då han kryssa målstreken som vinnar, peika han opp mot himmelen.

– Vi vann for vår femte mann i dag, han kjem alltid til å vere med oss, seier Christiansen til TV 2 etter sigeren.

– Vi er på veg sakte men sikkert tilbake alle mann. Det går litt opp og ned med oss alle, vi har forskjellige dagar som er gode og forskjellige dagar som er dårlege, seier Christiansen til TV 2.

Han forklarer at den siste tida har vore tung både fysisk og psykisk.

– Personleg var eg heilt, heilt tom for krefter torsdag og det kosta mykje å dra rett frå minnestund og gå rett ut på skirenn. Det klarte eg ikkje.

Før sprinten torsdag, var det minnestund for avdøde lagkamerat Sivert Guttorm Bakken:

Sekundstrid

Christiansen gjekk ut i tet saman med Frankrike og Tyskland etter ein god etappe av Martin Uldal.

Det blei spennande på den siste ståande skytinga då alle i teten bomma. Christiansen klarte likevel å klistre seg i ryggen på Perrot ut frå matta, og i spurten mot mål var nordmannen best.

– Det var ein tøff stafett. Eg var litt tung i beina frå i går, men eg prøvde berre køyre på, me kunne fort bli nummer fire i dag, seier Perrot til NRK.

Noreg vann stafetten framfor Frankrike, medan Sebastian Samuelsson gjekk Sverige inn til ein tredjeplass.

Noreg har vunne dei to første stafettane denne sesongen. Både i Östersund og Hochfilzen var det dei norske herrane som stakk av med sigeren.

I dag vann dei norske herrane sin tredje stafett, denne sesongen.

Sprakk på ståande

Etter ein god opningsetappe av Isak Leknes Frey, fekk Johannes Dale-Skjevdal eit perfekt utgangspunkt. Men då han kom inn til ståande skyting, sprakk han fullstendig. Noreg måtte ut i to strafferundar og gjekk ut heile 53 sekund bak Austerrike.

Hovudpersonen sjølv var skuffa etterpå:

– Eg veit ikkje heilt. Har ikkje noko godt svar på det, seier Johannes Dale-Skjevdal til NRK.

– Kjem i tet der. Det er tøft å stå på nummer ein, men det var veldig dårleg. Så det er skuffande, held han fram.

– Eg taklar nok eigentleg ikkje så godt å kome inn på nummer ein der, seier Dale-Skjevdal.

– Da er det vanskeleg for Noreg å henge med her, sa NRKs ekspert Ola Lunde.

Men Martin Uldal leverte rask og feilfri skyting på etappen etter, og kunne sende Christiansen ut i tet.

Tryna ut av standplass

Isak Leknes Frey starta sterkt for Noreg og tok leiinga etter to raske seriar. Men i det han skulle gå ut frå standplass, sklei han og gjekk i bakken.

– Det har dessverre skjedd før. Det skjedde i fjor også. Eg har ikkje lyst at det skal vere varemerket mitt, seier Isak Leknes Frey til NRK.

Han fortel at skia hang fast i matta då han skulle gå ut i leiinga.

– Synest det er litt merkeleg, det er kjedeleg når det skjer. Det kan vere noko med meg også, at eg er litt ivrig når eg skal ut av matta der, seier Frey.

Skytetrenar Siegfried Mazet la ikkje skjul på frustrasjonen då Frey gjekk i bakken. Han meiner utstyret på standplass må ta delar av skulda for fallet:

– Skytematta har fire skurer, og ein av skruane var kanskje litt for oppe, og skia kom borti, seier han til NRK.

– Eg gav beskjed til Ibu-sjefen, ikkje berre for oss nordmenn, men for dei andre også, seier Mazet.