Bytte ut brøytebil med babyar: Michael er historisk på fødestua

– Sjå på den vesle der, ho er ganske søt! Det er ei hyggeleg pasientgruppe, dette her, seier Michael Wahlstrøm.

Han bøyer seg over den 18 timar gamle jenta. I fleire tiår har han handtert betong og tunge køyretøy, nå undersøker han varsamt ein heilt fersk verdsborgar.

50-åringen har lagt verktøybeltet på hylla til fordel for ei 75 prosent fast stilling som barnepleiar på Sykehuset Østfold.

– Nå skal eg ta ei lysprøve av huda til barnet for å sjå etter gulsott. For ho er litt gyllen, seier Wahlstrøm.

Kontrasten er stor til den tidlegare kvardagen hans bak rattet på ein brøytebil eller med hammaren i handa som tømrar.

Tok fagbrev

Michael er sjølv far til fire. Frøet til karrierebytet blei sådd allereie da han blei pappa for første gong for 26 år sidan.

Men det blei mange år i handverksyrke før han tok steget. Først tok han fagbrev innan helsefag, og etter kvart vidareutdanning som barsel- og barnepleiar.

Han er den første mannen i Noreg med akkurat denne vidareutdanninga, ifølge fagbladet Fri Fagbevegelse som omtalte saka først.

At han skulle ende opp her, var ikkje sjølvsagt for mannen som har brukt mesteparten av yrkeslivet i tunge mannsdominerte yrke.

– Det er klart, eg blir berre eldre. Det er greitt å drive med noko som er lettare for kroppen, men som gir så mykje glede.

Her har vi bursdag kvar dag, smiler han.

Har blitt avvist

Sjukehuset Østfold har allereie ein mann tilsett som jordmor. Nå styrker Wahlstrøm laget som første mannlege barnepleiar.

Mottakinga er stort sett varm, men det er ikkje alle som slepp barnepleiaren inn på fødestua. Wahlstrøm fortel at avvisingane ofte har ei religiøs grunngiving.

– Det er kvinna sin fødsel. Kven som helst kan seie nei, så da byter vi.

– Har du opplevd det?

– Det har eg opplevd. Det er heilt greitt. Det er dei som skal føde, det er ikkje eg. Så det bestemmer dei.

– Lettare å spørje ein mann, meiner nybakt pappa

Wahlstrøm erfarer at fedrar tør å spørje ein mann om ting dei ikkje tør spørje kvinner om. På rommet til dei nybakte førstegongsforeldra Celine og Ramadan, blir han tatt godt imot.

Dei set pris på at det er ein mann i den elles kvinnedominerte avdelinga.

– Eg synest det er fint, eg. Å få litt anna enn berre kvinner her. Eg synest dei har litt meir omsorg, eg da, seier mor Celine.

For pappa Ramadan senkar skuldrene seg litt ekstra når han møter ein mannleg tilsett.

– Ein kjenner seg tryggare. Det er meir «rett ut». Ein tør å seie frå og spørje om ting. Det er lettare å spørje ein mann, seier Ramadan.

Ønsker fleire menn

– Det er utruleg gøy at Michael har starta hos oss. Det seier Stina Ekmann. Ho er seksjonsleiar på føda på Sjukehuset Østfold.

Ekmann meiner det er ei ære å få løfte opp barnepleiaryrke til å omfatte menn.

– Det gjer ein forskjell å få inn ein mann, dei tenker kanskje litt annleis.

Sjølv om Michael trivst som einaste mannlege barnepleiar på sjukehuset, legg han ikkje skjul på at han gjerne skulle hatt fleire mannlege kollegaer.

– Nokon må vere først. Eg synest eigentleg det var rart at det ikkje var fleire, men det er greitt.

– Det er ikkje veldig mange menn som jobbar med barn slik eg ser det, men det kan godt vere fleire, avsluttar han.