Blei bedt om å bruke deodorant midt i kamp – nå sjokkerer ho ekspertane

– Kan du be henne om å bruke deodorant? Ho luktar verkeleg ille.

Det sa britiske Harriet Dart til dommaren midt under ein kamp mot Loïs Boisson i WTA250-turneringa i Rouen i april.

Den mildt sagt oppsiktsvekkande beskjeden gjekk verda rundt. Nå er Boisson igjen i ferd med å gå verda rundt. Denne gongen av langt meir sportslege grunnar.

– Vitne til at ei stjerne blir fødd

I Roland-Garros i år, også kjent som French Open, har ho nemleg tatt seg heilt til semifinalen, som blir spelt seinare torsdag.

På vegen dit har ho blant anna slått ut Jessica Pegula og verdsseksar Mirra Andreeva. I semifinalen ventar verdstoar Coco Gauff.

– Det ein unik prestasjon. Det var ingen som hadde tippa eller snakka om ho på førehand. Det var ingen som visste namnet hennar, trur eg, seier tennisekspert og kommentator Christer Francke til NRK.

22-åringen fekk invitasjon til å delta i turneringa, hennar første Grand Slam-turnering i karrieren, og var rangert som nummer 361 i verda da turneringa starta.

Med ein plass i semifinalen har ho også spelt inn 780.000 euro, rundt 9 millionar norske kroner, meir enn fem gonger så mykje pengar ho har spelt inn tidlegare i karrieren.

– Vi er vitne til at ei stjerne blir fødd, sa Chris Evert, som har vunne 18 Grand Slam-titlar undervegs i kvartfinalen, ifølge ESPN.

– Ho kan vinne heile turneringa. Ein trudde det skulle bli stopp og at ho var fornøgd med å gå til fjerde runde og kvartfinale. Gauff har vore litt varierande. Om ho ikkje er fornøgd og har trua, så kan ho slå Gauff, seier Francke.

Tenniseksperten trekker fram nederlandske Martin Verkerk, som var rangert som nummer 46 da han gjekk til finalen i Roland-Garros i 2003, som det einaste liknande han kan hugse frå den franske storturneringa.

– Han var det heller aldri nokon som hadde høyrt om, seier Francke.

– Kva er det som imponerer mest med Boisson?

– Det er fysikken. Rørsla, styrken og at ho mentalt sett klarer å komme seg tilbake og reddar settballar. Ho vinn mot spelarar som er mykje betre rangerte og har større merittar. Det er det som kanskje imponerer mest, seier Francke.

Fekk unnskyldning

Men tilbake til denne deodorant-beskjeden da.

– Det er jo ganske spesielt. At nokon får høyre at dei luktar, det har eg aldri høyrt om før. Folk gjer rare ting og blir skulda for det eine og det andre, men lukt? Nei, seier Francke og ristar på hovudet.

Dart la seg seinare flat for kommentaren og beklaga til Boisson.

– Det var ein kommentar sagt da det stod på som verst, som eg verkeleg angrar på, skreiv Dart på Instagram i etterkant.

Franske Boisson klarte også å ta situasjonen med eit smil. Etter kampen mot Dart la ho ut eit bilde på Instagram av seg sjølv, med ein deodorant redigert inn.

– Tilsynelatande treng vi eit samarbeid, skreiv ho og tagga ein deodorant-produsent.

Nå kan Boisson bli første franske vinnar i single-klassen i Roland-Garros sidan Mary Pierce vann i 2000. Ho kan i alle fall rekne med støtta frå publikum i Paris.

– Det er ein draum. Eg vil gå for draumen, for det er draumen min å vinne, ikkje å komme til ein semifinale. Så eg vil gjere mitt beste for å klare det, sa Boisson etter sigeren onsdag.