Evttohii heaittihit Sámedikki - muhto presideanta dáhtušii baice nannet parlameanta
Ovddádusbellodaga sámediggeáirras Arthur Tørfoss oaivvilda ahte gielddastivrrat ja Stuorradiggi sáhttet seamma bures váldit vára sámiid beroštumiin go Sámediggi.
– Ii ovtta ge riikkas máilmmis leat dásseárvu nannosat go Norggas. Sámit meannuduvvojit seamma láhkai go earát Norggas, ja sámiin leat seamma vejolašvuođat olahit iežaset áššiin go earáin, oaivvilda son.
Tørfoss evttohii ge Sámedikki dievasčoahkkimis ikte ahte Sámediggi galgá dáhttut Stuorradikki heaittihit Sámedikki. Dát evttohus oaččui ge dušše ovtta jiena, namalassii su iežas.
Ovddádusbellodat lea badjel 30 jagi oaivvildan ahte Sámediggi berre heaittihuvvot, ja Stuorradikkis lea bellodat maid moaddelogi jagi ge evttohan heaittihit sámiid álbmotválljen parlameantta.
Sámediggepresideanta Silje Karine Muotka ii leat hirpmástuvvan Ovddádusbellodaga evttohusa geažil.
– Sámediggi dat gal doaibmá nu go galgá. Dien evttohusa lea Ovddádusbellodat juo máŋgii ovddidan Stuorradikkis ge. Doppe ii ge leat diesa eanetlohku, deattuha son.
Muotka mielas lea baicce dehálaš ahte Sámedikki sajádat ja doaibmá buorebut suodjaluvvo lága bokte.
- Servvodagas lea dál stuorra beroštumi Sámediggái. Lea maid stuorra beroštupmi sámediggeválggaide, lohká son.
English (US)