Ber om ti års forvaring for overgreps­tiltalt

Aktor Inger Myklebust ber om at ein mann i 40-åra blir dømd til forvaring i 10,5 år, med ei minstetid på sju år.

Det kjem fram under siste dag i rettssaka fredag.

– Eg meiner det er ein konkret og reell risiko for at han vil gjere nye overgrep, seier aktor. Ei tidsbestemt straff vil ikkje gi tilstrekkeleg vern for samfunnet, legg ho til.

Psykologspesialist Kåre Nonstad har tidlegare slått fast i retten at mannen har moderat til stor risiko for å gjere nye seksuelle handlingar mot barn.

Mannen er blant anna tiltalt for grov valdtekt av barn under 14 år, i tillegg til fleire andre seksuallovbrot mot mindreårige.

Mannen nektar straffskuld på alle tiltalepunkt.

– Det vi har høyrt om i bevisutføringa, handlar om seksuell utnytting av barn. Det handlar om ein vaksen mann som utnyttar maktbalansen i møte med barn, sa Myklebust innleiingsvis.

Fredag skal både mannens advokatar og barnas bistandsadvokatar uttale seg om straffeutmåling, og dommen vil komme seinare.

Seier han ikkje tar ansvar

Aktor peiker på at han skal ha fått ungane til å bytte seksuelle tenester mot småbeløp, brus og kjeks.

– Vi har høyrd ein tiltalt som ikkje tar ansvar. Han har blitt presentert for bevis etter bevis, og seier han ikkje hugsar.

Gjennom heile rettssaka har mannen sagt at han hugsar lite rundt det han er tiltalt for.

Medan aktor legg fram prosedyren, er mannen til stades digitalt. Han følgjer rettssaka frå Bergen fengsel og har ingen synleg reaksjon på påstanden frå aktor.

Vil ta frå han appar

Fleire av overgrepa skal ha skjedd over nett, og påtalemakta vil no ta frå han retten til å ha kontoar på ulike sosiale plattformer, som Snapchat, Kik og Whatsapp.

– Eg meiner han må tole inndraging av digitale einingar som han bruker til straffbar aktivitet, seier aktor Inger Myklebust. I tillegg skal han idømmast rettigheitstap, altså retten til å ikkje ha brukarar på Snapchat og Whatsapp, legg ho til.

Verken mannens forsvarar, Sjur Engelsen Lange, eller dei fire bistandsadvokatane har hatt ønske om å uttale seg gjennom rettssaka, som har strekt seg gjennom to veker.

Mannen er tidlegare dømt tre gonger for liknande forhold. I 2019 blei dømt for seksuelt krenkande åtferd mot 10 barn.

Han blei igjen dømt i 2023, og den siste dommen mot han er frå 2024, og gjeld seksuell åtferd med barn under 16 år.

Desse dommane hevdar han seg urett dømt i.

Ber om erstatning

Bistandsadvokat Gerd Haagensen ber om at mannen skal betale erstatning til det fornærma barnet som skal ha blitt utsett for grov valdtekt før fylte 14 år.

Ho ber om at han skal betale mellom 350.000 og 380.000 kroner i oppreisningserstatning til barnet.

Mannen har tidlegare gitt uttrykk for at han ikkje er i stand til å betale erstatningskrav.