Åtvarar mot å trasse EU: – Det er ein større trussel om vi ikkje innfører

– Vi er i ein situasjon der vi risikerer at USA går i ein handelskrig med Europa. Av omsyn til norske arbeidsplassar må vi innføre det som no ligg på bordet.

Det seier Frode Alfheim, som er leiar i LO-forbundet Industri Energi.

Arbeidarparti-leiinga jobbar no for å få igjennom tre delar av EUs fjerde energipakke.

Medan regjeringa sit i konferanse og diskuterer saka får Støre støtte frå LO-toppen. Alfheim fryktar at norske arbeidsplassar kan forsvinne dersom Senterpartiet får vilja si.

– Det er ein større trussel om vi ikkje innfører dei delane som no er på bordet, seier Alfheim.

Også LO-sekretær Are Thomasgard åtvarar mot å høyre på Senterpartiet.

– Det er ikkje noko kontroversielt i desse direktiva. Vi kan bruke tid og ressursar på ting som er heilt ukontroversielle. Det er berre tull å bruke energi på å krangle om det, seier Tomasgard til NTB.

Også EU-motstandarar i Ap har gått langt i å «ufarleggjere» direktiva som i dag ligg på bordet, symbolisert ved Trond Giske som uttaler at Senterpartiet «tek kampen på feil sak».

– Vi har ikkje ein einaste millimeter å gi

Rundt om i landet er mange spent på utfallet av kraftstriden.

– Senterpartiet set denne saka unødig på spissen, seier Gloppen-ordførar Arnar Kvernevik (Ap).

Han legg til:

– Men i eit valår er det ikkje så uventa.

I selskap med ei rekke andre Ap-ordførarar meiner han at Senterpartiet har lykkast (for godt) med å sette tonen og ramma for debatten.

Sandra Borch (Sp) leverte tidlegare i veka eit «straum-ultimatum» i VG.

– Senterpartiet har ikkje ein einaste millimeter å gi, sa ho.

– Vi er avhengige av å ha eit godt forhold til EU

Fleire Ap-ordførarar seier til NRK at Senterpartiet underslår at verda har endra seg på grunn av krigen i Ukraina.

I tillegg gjer toll-signala til Donald Trump at ein handelskrig kan vere like om hjørnet.

Om noko, taler utviklinga for å pleie eit tettare – ikkje eit fjernare – forhold til Brussel, samanfattar Kvernevik.

– Noreg avhengige av å ha eit godt forhold til EU, mellom anna for å eksportere andre varer som til dømes laks. Å ta inn delar av den fjerde energipakken kan vere tilstrekkeleg for å vise at vi kjem EU i møte i ei svært uroleg tid.

Han presiserer at han «som sosialdemokrat» er «opptatt av at vi i størst mogeleg grad skal ha nasjonal kontroll over kraftproduksjonen».

– Noreg kan ikkje berre hauste goda i det internasjonale samarbeidet. Eg håpar derfor at Sp kan følge Ap i denne saka, seier Bykle-ordførar Hans Blattmann.

Han sender følgande helsing til statsrådane som i dag møtest til regjeringskonferanse:

– Internasjonalt samarbeid handlar om å gi og ta.

– Andre er avhengige av oss, og vi er avhengige av dei

Ullensvang-ordførar Roald Aga Haug meiner at «den store harmen over energipakken er overdriven» og at fleire delar av energipakken er «heilt greie».

– Vi er ein eksportkommune, og EU er den desidert største marknaden vår.

Gulen-ordførar May-Lynn Osland ber statsrådane om å vektlegge kvardagsøkonomien til folk flest, og «passe på at vi ikkje kjem på kant med EU meir enn nødvendig».

– Vi må vare på energiavtalane. Andre er avhengige av oss, og vi er avhengige av dei.