Alle har høyrt musikken hans – men «ingen» veit kven han er

Sjansen er stor for at du har høyrt minst ein av dei:

Sjølve den ikoniske kjenningsmelodien til Lars Monsen.

Musikken til kjente TV-seriar som «Forræder» og «Spillet» på TV 2.

Eller «Familien Nerdrum» på NRK og musikken til «Karsten og Petra – Gullringen fra Atlantis».

Rett og slett lyden av mykje av det som går, og har gått, på TV i dag.

Bak all musikken som set preg på programma, er Raymond Enoksen frå Mosjøen. Ein klassisk utdanna komponist, som no bur på Stabekk utanfor Oslo med kona og sine to barn.

Det heile starta då Lars Monsen skulle ha ein introlåt til Canada på tvers for 20 år sidan.

Her viser han fram førsteutkastet som blei til på to korte timar:

– Har betydd alt

Det er 20 år sidan regissøren for Canada på tvers troppa opp på trappa til Enoksen sin studenthybel.

Etter første lytting visste han at dette var den riktige låten for Monsen sitt program.

– Den har på mange måtar betydd alt. Det var jo ein døropnar, den serien vart jo enormt populær og musikken vart veldig lagt merke til, seier komponisten.

Prosjektleiar for «Monsen og nasjonalparkene», Håvard Jenssen, meiner musikken har mykje å seie for TV-programma.

– Det er sjølvsagt at Monsen sjølv ein er ein unik TV-fyr.

Men det er også musikken, og at folk er så glad for å kjenne han igjen.

– Då veit dei at no skal vi sette oss ned, no kjem vi i denne stemninga og kan berre kose oss. No kan vi puste ut og vere på tur, og det underbygger musikken.

Enoksen har bidratt musikalsk til over 160 film og TV-seriar.

Her kan du bla deg gjennom nokre av dei:

Gir ut musikken etter 20 år

Enoksen og Jenssen har samarbeida mykje om «Monsen-musikken» over 15–16 år.

– Det har blitt eit DNA i den «monseniske forteljinga». Sett vekk frå Monsen sjølv, er musikken det viktigaste som denne pakken inneheld, seier Jenssen.

Han fortel at det er mange som har etterspurt musikken, enten til å spele av i 70-årslag, eller fordi ungdomar vil ha musikken når dei skal ut på tur sjølv.

I mars i fjor leia Enoksen innspelinga av musikken med Kringkastingsorkesteret til «Monsen og nasjonalparkene» frå produsentbua.

I februar i år gav Enoksen og Kork ut musikken på strøymetenestene for første gong.

Her instruerer han Atle Antonsen i plystringa av eit Monsen-tema:

Både dramaseriar og VM

Etter Monsen-musikken for 20 år sidan, som er rekna å vere Enoksen sin største kommersielle suksess, rann det fort inn med telefonar og moglegheiter.

Men den største kunstnariske utfordringa var musikken til dramaserien «Atlantic Crossing».

Serien slo breitt ned i Noreg og Norden, blei seld til USA og vist i alle dei 50 delstatane.

Men det er ikkje berre musikk til TV og film Enoksen har engasjert seg i.

Men han fekk også oppdraget om å lage musikken til TV-bilda frå VM som kjem til veka.

Vann gjev pris

I haust gjekk Raymond Enoksen heilt til topps under Barcelona Sant Jordi International film festival. Prisen vann han for å ha laga musikken til den svenske storfilmen «Hammarskjöld».

– Min inspirasjon kjem av dei bilda eg får. Inspirasjon blir på en måte gitt oss i fanget, seier Enoksen.

Det blei hans første internasjonale individuelle pris.

– Eg drøymer sjølvsagt om å ha fått ein, i lat oss seie Hollywood, kor ein har så mykje ressursar tilgjengeleg. Det er noko ein aldri har i Europa på same måten.

– Er det ein draum du har, å få ein Hollywood-film?

– Eg burde sikkert seie ja, men på ein måte nei også, for eg synest jo europeisk film ofte er blant dei beste filmane då.

– Går nok under radaren

Programleiar og filmmeldar i NRK, Birger Vestmo, meiner at musikken er ein integrert del av ein kva som helst film. Musikken hjelper oss å forstå historia si stemning.

Skal vi le, gråte eller synest at noko er skummelt?

– Musikken er ein viktig reiskap for ein kva som helst filmskapar for å hjelpe publikum å forstå historia som blir fortalt.

– Det er nok eit fagfelt som ofte går litt under radaren for vanlege folk, fordi vi er vande med at filmmusikken berre er der, seier Vestmo.

Fleire filmar ville ha gitt ei heilt anna oppleving utan musikken, meiner han.

– Lyd generelt i film er omtrent halve opplevinga, og her er filmmusikken ein veldig viktig del.

– Gjer mest av alle i Noreg

Filmmusikk-vitar Thor Joachim Haga høyrde først om Enoksen då han gjorde musikken til «Ut i vår hage» for snart 20 år sidan.

– Han skil seg ut ved at han openbert har ein høg arbeidskapasitet. Eg vil seie at han akkurat no gjer mest av alle i Noreg.

Men også ved at han er god på å blande ulike trendar i musikken.

– Internasjonale og amerikanske trendar med europeiske og norske. Mens andre komponistar kanskje er litt meir i si eiga boble, seier Haga.

– Så er han veldig god på å ha eitt tema som han skriv og gjer ulike variasjonar av. Det trur eg også er fordi han varierer dei inni sjølve episodane. Så gjer han morosame variasjonar av det tema som kjem igjen og igjen.