26.000 kr forskjell i kommunale avgifter: – Ikkje sett større skilnadar

Ferske tal frå Huseiernes Bokostnadsindeks viser stor spreiing mellom dei kommunale avgiftene til kommunane.

Altså prisen innbyggjarane betaler for vatn, avløp, renovasjon og feiing.

I Årdal kommune i Sogn ligg dei kommunale avgiftene på kr 12.184, som er lågast i landet.

– Vi er heldige her i Årdal. Vi er fornøgde, seier småbarnsfar og huseigar i Øvre Årdal, Morten Sortland.

Til samanlikning ligg snittet i landet på kr 18.907. Store bykommunar som Bergen, Tromsø og Trondheim ligg litt under gjennomsnittet, mens Oslo ligg litt overe med 20.374 kroner.

Slik er dei kommunale avgiftene i dei store byane (pluss Årdal og Marker):

Marker kommune i Østfold ligg på 38.570 kr. Ein prisforskjell på 26.386 i høve til Årdal.

– Vi har ikkje sett større skilnader tidlegare, fortel distriktsleiar Jan Eirik Mardal i Huseierne, avdeling Sogn og Fjordane.

Finn din kommune her:

I Marker bur det færre innbyggjarar spreidd, medan dei i Årdal bur meir konsentrert.

– Forskjellane kjem særleg av utfordringar med vatn og avløp, der Marker har veldig høge avgifter og Årdal låge, seier Mardal.

Bur tett – effektiv drift

Sjølv om avgiftene er låge i Årdal kommune, står ikkje det i vegen for kvaliteten.

– Årdal yt gode tenester, som både er effektivt og billig. Vi har vel eit av landets beste drikkevatn, fortel innbyggjar Sortland.

Dei siste seks åra har avgiftene i Årdal dobla seg. Desse kan auke vidare i takt med nye investeringar, men Sortland er ikkje bekymra.

– Ei auke for å nå nye krav på vatn- og reinseanlegg har nok folk her forståing for.

Dei kommunale avgiftene fordelar seg slik; renovasjon (4351 kr), vatn (3782 kr), avløp (3391 kr) og feiing (659 kr).

Ordførar i Årdal, Christian Sønstlien, er godt nøgd med situasjonen i si eiga kommune og seier det er fleire faktorar til at dei ligg så lågt.

– Det er vi stolte av. Vi har investert smart og har gode grunnvasskjelder. Vi bur veldig tett så det blir effektivt å drifte slik type tenester.

Må investere i nye anlegg

I Marker kommune ligg avgiftene vesentleg høgare, på 38.570 kr

Fungerande kommunedirektør i Marker kommune, Vidar Østenby, fortel at dei helst ikkje skulle vore i toppen, men at dei ikkje har noko val i dagens situasjon.

– Vi må oppfylle eit reinsekrav, ha god vassforsyning og reserveforsyning. Og vi er ikkje så mange abonnentar å fordele kostnaden på.

Marker sine avgifter er fordelt slik: Avløp (20.378 kr), vatn (12.559 kr), renovasjon (5041 kr) og feiing (591 kr)

Dei siste seks åra har kommunen hatt ei auke på over 23.000 kr. Det kjem av nye oppgraderingar.

– Vi har investert over 200 millionar kroner i eit nytt reinseanlegg som snart står ferdig. Dei kommunale avgiftene vil dessverre stige litt til før dei flater ut.

Prisen kan skyte i vêret

Norske kommunar står overfor store investeringar for å møte EU-krav knytt til vatn, avløp og reinsing dei neste åra.

Ein rapport Miljødirektoratet har fått laga viser at det vil kunne koste 33 milliardar kroner i investeringskostnader å møte dei nye krava.

Ifølge rapporten må til saman 142 kommunar investera i oppgradering eller nybygging. Det handlar om rundt tusen reinseanlegg fordelt på om lag 500 tettstader.

I tillegg vil meir ekstremvêr mange stader føre til at infrastruktur må oppgraderast for å ta unna vatnet.

– Det er eit enormt investeringsbehov og etterslep på vedlikehald i vatn- og avløpssektoren, fortel Mardal i Huseierne.

Trass låge kostnader i Årdal per no, er ordførar Sønstlien ærleg på at kostnadane kan bli større kommande åra.

– Det handlar om korleis ein skal reinse avløp, og der må Noreg og EU lande eit direktiv. For reinseanlegga kan bli dyre.