Utrøysteleg Tandrevold: – Hjarteskjerande på alle måtar

Veslejulaftan kom beskjeden om at skiskyttar Sivert Guttorm Bakken hadde gått bort.

Bakken blei funnen død med høgdemaske på hotellrommet sitt i Lavazè.

Fleire andre utøvarar var til stades på same hotell i Italia. Ein av dei var Ingrid Landmark Tandrevold. Ho hadde også med seg ektemannen Trygve Bendixen Markset.

– Det var veldig rart, sjølvsagt, men også på ein måte fint i nokre augeblinkar, seier Landmark Tandrevold til NRK i Oberhof mens stemma hennar brest.

Det er første gongen Landmark Tandrevold møter pressa etter dødsfallet. Fleire gonger i intervjuet med NRK stoppar ho opp og tørkar tårer, og er sterkt prega av å snakke om bortgangen til Bakken.

Til helga skal skiskyttarane for første gong gå verdscup sidan dødsfallet.

– Hjarteskjerande

Tandrevold beskriv tøffe dagar i Lavazè etter at ho fekk beskjeden om dødsfallet.

– Eg visste at det var der Sivert ville vere, og det er klart at det er ein stad han treivst veldig godt. Det blir mange augeblinkar som er veldig kjenslerike, men det å gå på ski rundt der kan kjennast feil, men også kjennest veldig fint å sjå dei fjella og den solnedgangen som Sivert elska. Prøve å sette pris på det for han òg, fortel Landmark Tandrevold, tydeleg påverka av temaet.

Ho fortel at ho fekk beskjeden om Bakken sin bortgang tidleg på veslejulaftan saman med dei andre som var til stades på hotellet.

– Det var sjølvsagt noko ein aldri trur ein skal oppleve, hjarteskjerande på alle måtar. For det første så er ein lei seg, men så skjønner du også kor mange som kjem til å bli ramma, familien til Sivert, som eg har tenkt utruleg mykje på, seier ho.

Hadde med seg ektemannen

Ho beskriv det heile som ein forferdeleg tragedie.

– Det er ein gut, ikkje ein mann ein gong, som har gått bort før han har starta livets sommar, fortel skiskyttarstjerna.

Flere utøvarar som var der hadde med seg sine næraste. Landmark Tandrevold hadde med seg ektemannen Trygve Bendixen Markset.

– Det var heilt avgjerande. Vi som var der hadde våre næraste der, og vi samla oss. Vi feira jul så godt det lét seg gjere saman, og kunne kjenne på alle kjenslene saman. Det har vore fint oppi det heile, fortel Landmark Tandrevold.

Skulle trene med Bakken

Italienske Tommaso Giacomel var på trening ved hotellet da det skjedde. Den italienske skiskyttaren møtte onsdag pressa for første gong sidan dødsfallet, og var tydeleg prega av det heile.

Italienaren hadde planlagt ein treningstur med Bakken den tysdagen han døde.

– Det var forferdeleg å vere på staden kor det skjedde. Det var rart. Eg har aldri opplevd noko liknande før, og det å vere nære Johan-Olav Botn, Einar Hedegart og Ingrid Landmark Tandrevold, og fleire, det var ganske spesielt, seier Giacomel.

Italienaren køyrde heim seinare den dagen, og seier han ikkje anar korleis han var i stand til å gjennomføre køyreturen.

Han huskar godt korleis han fann ut at Bakken var død. Italienaren var ute på skitur med Hedegart og Tandrevold, og la merke til ein på snøskuter som køyrde i full fart for å finne langrennsløpar Karoline Simpson-Larsen. Da personen ropte febrilsk på Simpson-Larsen, forstod dei at noko hadde skjedd.

Tilbake ved hotellet såg dei at Botn kom løpande ut, og at ambulansen og politiet kom til staden.

– Vi gjekk til hotellet og da fekk vi vite det tragiske som hadde skjedd med Sivert, seier Giacomel gråtkjøvd.

Meiner fleire har vore respektlause

Han huskar godt den siste samtalen han hadde med Bakken. Det var etter prisseremonien i Frankrike berre dagar før, da Giacomel vann fellesstarten.

– Han hadde ein fin hatt, og han var veldig glad på mine vegne. Da eg gjekk ned frå pallen, så sa han at vi skulle gå saman i fire timar på tysdagen. Egsa ja, men det skjedde jo aldri.

Giacomel la etter dødsfallet ut eit innlegg på Instagram for å heidre sin avdøde venn, som han har kjent godt sidan 2017. Italienaren reagerer på korleis enkelte har mottatt innlegget han la ut.

– Mange folk forstod situasjonen, og nokon gjorde det ikkje. Enkelte bør kanskje søke opp kva ordet respekt betyr.

– Kva meiner du da?

– Kanskje respekt i den grad når du veit at nokon har mista ein god venn, så kan du ikkje ringe den personen same kvelden og forvente at dei kjem til å svare deg.

Tysdag 13. januar er det bekrefta at Bakken skal bisettast. Giacomel seier han håpar å få moglegheit til å reise dit.

På spørsmål om han vil dedikere eit eventuelt OL-gull i februar til Bakken, svarar italienaren kort:

– Ja!

Følgde opp Tandrevold

Patrick Oberegger, som er trenar for elitelandslaget for kvinnene, var den første frå skiskyttarforbundet som reiste til Lavazè.

– Det var eit sjokk, uverkeleg. Ein skjønner det først nokre dagar etterpå, og livet blir ikkje som det har vore før. Det blir annleis, seier Oberegger til NRK.

Han fortel at oppgåva hans blei å fungere som støtte for utøvarar og andre som var ved hotellet. Blant anna logistikk, og å hjelpe til i kommunikasjonen mellom politiet og utøvarane.

– Eg var ein sparringpartnar, ein å snakke med og ein som prøvde å vinkle diskusjonane i ei anna retning, forklarer han.

Oberegger prøvde også å følge opp Landmark Tandrevold sin treningskvardag i dagane etter.

– Det var vanskeleg. Vi var vel tettare i juleferien enn nokosinne. Eg har prøvd å følge ho opp på trening, ha ein god plan på alt, og prøvd å komme litt tilbake på sporet.

Reiser tilbake til Lavaze

Trenarkollega på kvinnelandslaget, Sverre Huber Kaas, fortel at han har prøvd å vere ein god samtalepartnar for Landmark Tandrevold i den tunge tida.

– Vi har prøvd å snakke mykje med henne for å ha fokus på dei tinga som vi merkar at ho har på hjartet.

Huber Kaas fortel at dei er førebudde på at det kan gå opp og ned på den mentale sida for enkelte utøvarar i tida som kjem. Det er også med ein eigen psykolog til Oberhof denne helga, sånn at utøvarar som ønsker kan få profesjonell hjelp.

– Det har vore veldig fint å ha med folk utanfrå som kan hjelpe oss med dei tinga, seier han.

Skiskyttarane har heile tida hatt ein plan om å ha oppkøyringa til OL ved det same hotellet i Lavazè som Bakken døydde på.

Til TV 2 bekreftar landslagssjef Per Arne Botnan at den planen framleis står.

– Pre-campen til OL blir i Lavazè som planlagt. Vi har hatt litt diskusjon rundt det, men fleire tenker at Sivert ville sparka oss hardt i leggen om vi hadde valt det nest beste, seier Botnan.