Trur pakke­tjuvar herjar: – Dei er på jakt

Med «Black Friday», «Black Week» og førebuingar til jula, er det fleire som bestiller pakkar på nett.

Éin av dei, er Nicoline Kjærnsrød i Ålesund.

Ho seier at pakken vart levert i postkassa hennar klokka 06:06 om morgonen, og då ho skulle hente den halvannan time seinare, var han forsvunnen.

Eska fann ho nokre hundre meter unna, men innhaldet var ikkje å oppdrive.

– Denne eska har nokon tatt eit godt tak i, tatt ut det som er inni, og slengt det frå seg.

Liknande hendingar har også skjedd tidlegare i haust i både Bergen, Tromsø, Askim og Stavanger.

Nicoline Kjærnsrød har funne opprivne esker slengt rundt nabolaget.

Foto: Live Vigestad Valderhaug / NRK

– Ei veldig hektisk tid

Fleire av dei forsvunne pakkane er bestilte gjennom postleverandøren Helthjem.

Kommunikasjonssjef i Helthjem, Marius Husebø-Evensen seier at dei generelt har fått fleire meldingar den siste tida.

– Er det mange som melder inn om stolne pakkar?

– Vi har fleire meldingar no enn resten av året. Det er kanskje først og fremst fordi det er ei veldig hektisk tid. Det er den tida på året der vi leverer flest pakkar.

Han meiner det er fleire meldingar fordi det er fleire pakkar i omløp.

– Ein fellesnemnar for fleire av dei forsvunne pakkane, er at dei er bestilt via Helthjem. Kva trur du er årsaka til det?

– Det er vanskeleg for meg å spekulere i årsaker i lokalområdet, men vi må følgje med her, det er ikkje sånn det skal vere.

At det er ei hektisk tid for postselskapa, er det ingen tvil om. Under Black Week i 2023 sende Posten rundt 2,5 millionar pakkar til nordmenn berre på ei veke, ein 12 prosent auke frå året før.

Og i 2025 har Posten meldt at dei oppbemannar under «Black Week» for å handtere alle pakkane.

Men ifølgje postselskapa, er ikkje pakketjuveri eit stort problem:

Fire meldingar på tre dagar

Ole Ivar Nybø er seksjonsleiar i Møre og Romsdal politidistrikt. Han seier dei har mottatt fire meldingar om pakketjuveri i nabolaget der Nicoline Kjærnsrød bur.

– Meldingane går ut på at pakkar er tatt frå fire postkasser. Det har skjedd i geografisk og tidsmessig nærleik, derfor ser vi sakene i samanheng, seier han.

Han oppfordrar alle som har opplevd liknande om å melde frå til politiet.

– Vi ønsker at dei som har opplysningar tar kontakt med politiet så vi får vite om det. Om nokon har opplevd det same ønsker vi at det blir meldt, så vi får oversikt over omfanget.

Vil dei skal slutte

Nicoline Kjærnsrød seier ho er éin av dei som har meldt forholdet.

– Vi snakkar jo om det alle saman, og sender meldingar til kvarandre. Det er nokon som går rundt her, dei er på jakt, det er ikkje vanskeleg å forstå, seier ho.

NRK har vore i kontakt med fem andre personar som bur i nabolaget, og som seier dei har opplevd det same som Nicoline Kjærnsrød.

Ho kjem med ei tydeleg oppfordring til dei eventuelle gjerningspersonane.

– Slutt. Det er privat. Det er vi som har bestilt varer, og det er mi postkasse. Det er ingen som har noko der å gjere.