USAs president Donald Trump landa i Sveits onsdag ettermiddag, etter at han blei forsinka fordi det var tekniske feil på presidentflyet, Air Force One.
Men trass i at han var forsinka, gjekk han på scena i Davos, kort tid etter det som var planlagt klokka 1430.
– Det er flott å vere i vakre Davos i Sveits. Og å tale til så mange respekterte forretningsleiarar, så mange vennar, få fiendar, sa Trump til latter frå salen.
Donald Trump i Davos.
Foto: FABRICE COFFRINI / AFP / NTBHan gjekk raskt over til å snakke om Europa, der han meiner utviklinga går feil veg.
– Eg elskar Europa og vil gjerne sjå at Europa gjer det bra. Men det går ikkje i rett retning, sa han.
Han hevdar «Europa snudde ryggen til alt som gjer nasjonar rike, mektige og sterke».
– Drivne av den største massemigrasjonen i menneskets historie. Vi har aldri sett liknande. Mange delar av verda blir øydelagt framfor auga våre, og leiarane forstår ikkje kva som skjer, hevda han.
Spent forhold
Han kjem til Verdas økonomiske forum i Davos etter ei tid der forholdet mellom USA og allierte Nato-land er spent fordi Trump seier USA må overta Grønland frå Danmark av sikkerheitsomsyn.
Både Danmark og Grønland har avvist dette. Danmark og fleire Nato-land har sendt militært personell og utstyr til øya.
Trump har svart på dette med å truge med straffetoll mot landa dersom USA ikkje får overta Grønland.
Det er difor knytt stor spenning til kva den amerikanske presidenten vil seie om Grønland og forholdet til europeiske allierte i talen sin.
- Kva er Verdens økonomiske forum?
Verdens økonomiske forum (WEF) blir halde kvart år i alpebyen Davos i Sveits. Forumet samlarpolitiske leiarar, næringslivstoppar, forskarar og organisasjonar for å diskutere globale utfordringar som krig, økonomi, klima, teknologi og tryggleik.
Det blir leia av tidlegare Høgre-politika Børge Brende.
- Kva skjer på forumet i Davos?
I tillegg til opne debattar og talar, blir det halde mange lukka møte der statsleiarar og toppsjefar diskuterer samarbeid og politikk.
- Kvifor er forumet viktig?
Kvart år deltar 3000 av dei som påverkar verdsøkonomien og internasjonal politikk, for å diskutere samarbeid om løysingar på store globale utfordringar som menneskerettar og miljø.
- Kvifor er Davos særleg interessant i år?
Forumet skjer medan det pågår eit storpolitisk drama om Grønland, etter at USAs president har sagt at USA bør ta kontroll over øya av omsyn til tryggleik.
Det gjer at tryggleikspolitikk og forholdet mellom USA og Europa, og ikkje minst Nato-alliansen står sentralt på agendaen.
Økonomi onsdag
Ifølge ein høgtståande tenestemann i Det kvite huset, skal Trump bruke onsdagen i Davos til å snakke om økonomisk politikk knytt til «America First»-politikken, melder Reuters.
Torsdagen skal han bruke på utanrikspolitikk, og skal blant anna komme inn på Grønland og Venezuela, i tillegg til det planlagde «fredsrådet», seier tenestemannen.
Fleire land og statsleiarar har fått tilbod om å sitte i rådet. Men Noreg og Sverige har takka nei til invitasjonen.
Publisert 21.01.2026, kl. 14.40 Oppdatert 21.01.2026, kl. 14.54
English (US)