Trafikkaos på Valdresflye måndag: Bilar står igjen langs vegen

Fylkesveg 51 over Valdresflye var tidvis heilt uframkommeleg den første dagen i påskeveka.

Folk hadde parkert bilane sine i vegbanen på begge sider og politiet kalla ut eit helikopter for å få oversikt over situasjonen.

Finvêret og skiføret i på 1300-meters høgde fekk skulda for den store utfarten. Litt mindre knallvêr-utsikter for tysdagen, gjer at Vegtrafikksentralen håpar det blir mindre trøbbel i dag.

– Vi har ikkje meldt så fint vêr i dag som det var i går. Så vi får håpe at kanskje folk finn på noko anna, eller vel ein annan skitur, da.

Det seier Trude Lindstad, som er trafikkoperatør i Vegvesenet.

• Palmelaurdag starta problema, då påsketuristane parkerte langs vegen for å gå på ski.

Bilar over natta

Bileta frå Vegtrafikksentralen sitt webkamera på Fylkesvegen over Valdresflye viser at trafikken alt er i gang i morgontimane tysdag.

Då vegen opna etter nattestenging var skituristane på plass. Og fleire bilar har stått der over natta, fortel Lindstad.

– Nokon få biler står parkert, men dei ser ut til å stå i dei lommene som er tilgjengelege, seier ho.

Måndag måtte politiet kallast til fylkesvegen for å få orden på situasjonen. Det kan bli aktuelt igjen dersom det blir kaos på nytt. Vegvesenet er i løpande kontakt med dei.

– No får vi berre håpe at det blir ein rolegare dag, og at alle kjem seg dit dei ønsker. Og har litt omsyn til kvarandre og trafikken og ikkje minst trafikksikkerheit, seier Trude Lindstad.

Også på Vestlandet blir det meldt om trøbbel på fjellovergangane, og dei ber om at folk brukar oppmerkte parkeringsplassar.

• Rett før påske vart det meldt om at folk ville til fjells, trass i sein påske.