2 weeks ago
15
– Eg bryr meg ikkje om burgaren eller pengane, men eg synest dei skal svare meg.
Fredrik Gunnestad var klar i talen då ei enkel matbestilling gjekk skeis, og det var tyst frå ein av Noregs mest kjende hurtigmatkjeder.
For tre veker sidan skulle nemleg Gunnestad og familien ha seg ein rask matbit på McDonalds medan dei var ute på farten.
For 276,25 kroner bestilte Gunnestad to BigMac-menyar via McDonalds-appen på telefonen.
Han fekk ei stadfesting for bestillinga på e-post, men maten kom aldri.
– Kva som hende er jo eit mysterium for meg og. Verken ordren eller maten dukka opp, seier Gunnestad.
For ordens skuld: Gunnestad er administrerande direktør i det TV 2-eigde dotterselskapet Vimond Media Solutions.
Ingen svar
Gunnestad og familien måtte forlate McDonalds med uforretta sak.
Ordren hadde aldri kome gjennom frå mobilen til restauranten, og paret hadde ikkje tid til å bestille på nytt, då dei skulle rekke ein avtale.
Dagen etterpå sende han ein e-post til McDonalds sin kundeservice og forklarte kva som hadde skjedd.
Først fekk han svar, med spørsmål om kva restaurant dette gjaldt.
– Eg svarte ganske med ein gong, og rekna med det ville ta nokre dagar før eg fekk svar på ny. Men eg høyrde ikkje noko meir etter det, seier Gunnestad.
Han sende ein ny førespurnad etter nokre dagar. Og så ein ny. Og så ein ny.
– No har eg sendt sju e-postar på tre veker. Eg har enno ikkje fått svar, men eg skal ikkje gi meg, seier Gunnestad når TV 2 først snakkar med han.
– Gir blaffen
Han seier han ikkje er noko prinsippryttar til vanleg, men han meiner det berre er rett og rimeleg at McDonalds gjer opp for seg.
Før svaret frå McDonalds endeleg kom, var han klokkeklar.
– Eg vil berre at dei skal svare meg og at dei skal gidde å gjere jobben sin. No verkar det som at dei gir blaffen i kundane sine.
Han var klar på at han skulle sende e-post heilt til han fekk svar.
– Eg skal sende e-post kvar dag. Laurdag og sundag og. Dei skal få så mykje mail at dei ber om nåde til slutt.
– Kor lenge skal du gjere dette?
– Eg tenker hundre er et fint tal. Deretter skal eg sette opp automatisk funksjon som sender ti e-postar om dagen.
Beklagar overfor kunden
TV 2 kontakta først McDonalds, som beklaga til kunden for at han ikkje hadde fått svar.
Kristina Johansen, kommunikasjonssjef i McDonalds, sa torsdag kveld at dei ikkje fann saker i arkivet knytt til Gunnestad si e-postadresse.
– Eg har inga god forklaring på kva som har skjedd her. Vi skal ringe han i morgon for å få beklaga og avslutta saka, slik at han slepp purre meir, sa Johansen.
Ho seier de set pris på at Gunnestad ikkje gjev opp, sjølv om han hittil ikkje har fått svar. Dei lover å sjekke opp i saka.
– Veldig merkeleg
Når TV 2 fortel Gunnestad at McDonalds ikkje finn saker på ham, vert han svært overraska.
– Det er jo veldig merkeleg, sidan eg både har sendt e-post og fått svar frå dei, seier han.
TV 2 har sett e-postkorrespondansen mellom Gunnestad og McDonalds sin kundeservice.
Alle e-postane hans er sendt til den same e-postadressa som først svarte han med spørsmål om restaurant.
Gunnestad gjentek at dette ikkje handlar om burgaren eller pengane, men prinsippet om at kundar skal ha god kundeservice.
– Dei hadde berre trengt å svare meg og seie unnskyld, så hadde alt vore greitt. Når eg ikkje høyrer noko som helst, så held eg fram med å purre.
Løysinga
Så, fredag føremiddag, får Gunnestad endeleg ein telefon frå hurtigmatkjeda.
– Der beklaga dei på det sterkaste. Eg har også fått ein skriftleg beklagelse, refundering av pengane, og eit gåvekort som plaster på såret.
– Kva tenkjer du om det, då?
– Etter at riksmedia tok tak i saka, så blei det bot og betring, men eg synest framleis dei har litt å gå på når det kjem til kundeservice. Eg skal i alle fall slutte å sende dei e-post, seier Gunnestad.
– Det vert fleire burgarar?
– Ja, men dei blir ikkje bestilt med mobiltelefon.
English (US)