Terrorsikta varsla sjølv politiet for eitt år sidan – blir lauslaten frå varetekt

Ein mann frå Møre og Romsdal vart sett i varetekt mistenkt for terrorplanlegging, bekrefta PST til NRK i går.

Forsvararen til mannen, Mari Vik-Slettevoll, seier at han nektar straffeskuld.

– Bakgrunnen for siktinga er at han har vore involvert i kommunikasjon på nett, i ein slik karakter at han sjølv, på eige initiativ, fann det nødvendig å varsle politiet. Dette var for eitt år sidan.

Men det var først i førre veke at mannen blei arrestert og sett i varetekt. Kva innhaldet i denne kommunikasjonen var, kan ikkje forsvararen gå inn på.

PST kan ikkje svare på kvifor mannen først vart arrestert no, når han sjølv varsla politiet for eitt år sidan.

Blir lauslaten frå varetekt

Politiets tryggingsteneste har avbestilt morgondagens fengslingsmøte mot mannen i 20-årene. Det får NRK opplyst frå Møre og Romsdal tingrett.

Det betyr at mannen som har vore i varetekt i nesten ei veke, blir lauslaten.

– PST har bestemt å ikkje be om ytterlegare varetektsfengsling av sikta då dei innleiande etterforskingsskritt er gjennomført. Siktinga blir opprettheldt, og etterforskinga held fram, seier påtaleansvarleg Kathrine Tonstad i Politiets tryggingsteneste.

PST opplyser at dei har sett i verk husransaking og gjort dei beslaga dei meiner er nødvendige for at det ikkje skal vere fare for øydelegge bevis.

– Trur de at det var planar om terrorhandlingar i Noreg eller i utlandet?

– Vi har ikkje indikasjonar på at det var planar om terrorangrep i Noreg, seier Tonstad til NRK.

Sikta for terrorplanlegging

Mannen er sikta for å ha brote straffelova § 133 om terrorforbund. Han skal ha inngått ein avtale med andre om å gjennomføre ei terrorhandling, melde PST i går.

Mannen er i tillegg til terrorplanlegginga sikta for å ha kome med hatefulle ytringar.