Slik ser hytta ut etter den kraftige eksplosjonen

– Det høyrdest ut som ei bombe, seier ein hyttenabo til NRK.

15 minutt inn i det nye året starta med eit skikkeleg smell i ei hytte i det populære hytteområdet Hafjell i Innlandet.

Då fekk naudetatane melding om brann i ei hytte der det også skal ha vore fyrverkeri involvert.

Kva som skjedde, veit politiet foreløpig ikkje.

Men politiet omtalar det som ein eksplosjon i boden inne i hytta, noko som førte til store skadar på bygget.

Det var to born og tre vaksne på hytta.

Ein av dei vaksne, ein mann i 50-åra, vart skadd og flydd til Ullevål sjukehus med alvorlege skadar.

«Uvanleg»

NRK har snakka med fleire hyttenaboar i området, som ikkje ønsker å stå fram med namn.

Fleire omtalar smellet frå eksplosjonen som «uvanleg».

Mannen var inne i boden då det eksploderte og starta å brenne i rommet.

Han klarte å ta seg ut og vart raskt tatt hand om og gitt førstehjelp av fleire hyttenaboar som kom springande til.

• Les også om at sju personar fekk augeskadar under nyttårsfeiringa. Det er det lågaste skadetalet på over 20 år.

Politiet etterforskar saka

Politiet har foreløpig ikkje avhøyrt mannen i 50-åra som vart skadd i eksplosjonen eller andre som var til stades.

– Politiet etterforskar hendinga og vil prøve å finne ut av kva som har skjedd og kva som er årsaka til eksplosjonen, politiadvokat Tore Martin Søbak Gundersen.

– Det inneber også å prøve å få svar på om det har skjedd noko straffbart.

Politiet planlegg no kriminaltekniske undersøkingar på åstaden, og vil avhøyre personar som var på staden.

Ingen er sikta i forbindelse med eksplosjonen.

• Folk flest vil forby privat fyrverkeri om kommunane står for showet. Oslo kommune droppa fyrverkeria til fordel for noko heilt anna.