3 days ago
10
Store delar av landet kan vente seg snø.
Publisert 31.12.2024 15:40 Sist oppdatert 6 minutter siden
For mesteparten av Sør-Noreg sin del har det vore ein mild vinter og lite snø fram til no.
– Det har vore mildt og fuktig, regntungt og ei grøn jul, typisk det ein forbind med ein mild vinter, seier vakthavande meteorolog Olav Erikstad i StormGeo.
Dei neste dagane vil det bli annleis.
Varslar kaldare vêr
Frå nyttårsaftan av vil nemleg lågtrykka kome inn lenger sør i Noreg enn det har gjort til no.
Dermed vil vêret i større grad likne på slik det var førre vinter, med meir kulde og snø, fortel Erikstad.
– Da får vi ein annan vêrtype med mykje meir kaldluft. Og etter det, fortset det berre sånn, seier Erikstad.
– Vi blir liggande i ein lufttype der vinden stort sett kjem frå nord eller aust. Då blir det kaldt, legg han til.
Har sendt ut varsel
Det er sendt ut gult farevarsel for snø fleire stader i landet. I Salten og nord på Helgeland er det oransje farevarsel.
Erikstad seier at store delar av landet vil få snø nyttårsaftan, men at det i periodar kan kome regn langs kysten av Rogaland, Agder, Telemark og delar av Østfold.
Også i Nord-Noreg, der det allereie har kome ein del snø, vil byene halde fram.
– Dei fleste stader i Sør-Noreg vil få snø heile tida, eller berre forbigåande regn, seier Erikstad.
Gode skiforhold
Med snøen som har kome, kan det også blir mogleg til å gå på ski.
Thomas Haugsbø har køyrt løyper på Langeland skisenter i Sunnfjord tysdag morgon. Det har kome eit snøfall i området dei siste dagane som har kome godt med. Også dei neste dagane ser det lovande ut.
– Meldingane framover er bra, med blå grader, seier Haugsbø, som først snakka med Firda om saka.
Han fortel om godt føre, og dei fleste løypene, bortsett frå dei lengste, er no tatt i bruk.
SKIFØRE: Slik såg det ut på Langeland i Sunnfjord nyttårsaftan. Foto: Thomas Haugsbø
SKIFØRE: Slik såg det ut på Langeland i Sunnfjord nyttårsaftan. Foto: Thomas Haugsbø
Utfordringar i trafikken
Vêret har skapt utfordringar i trafikken enkelte stader tysdag.
På Alsgården sør for Mosjøen i Nordland var det eit trafikkuhell mellom eit vogntog og ein personbil. To personar var involvert, men det blei ikkje meldt om alvorlege skadar.
Ifølge politiet var det svært vanskelege køyreforhold på staden.
Det blei også meldt om glatt veg på fv. 500 i Herøysund i Kvinnherad, der ein bil køyrde inn i nokre steinar utanfor vegen. Dei to personane som var i bilen, kom uskadd frå ulukka.
Alle dei mest trafikkerte fjellovergangane i Noreg er opne, utanom på E134 over Haukelifjell, der det er kolonnekøyring. Også på E6 over Hatter i Finnmark er det kolonnekøyring.
English (US)