Rettssaken mot Marius Borg Høiby starter i Oslo tingrett

Andre spørsmål om Høiby-saka

• Kvifor omtalar NRK denne saka?

  Tiltalen og rettssaka mot Marius Borg Høiby har stor offentleg interesse.

  For det første er lovbrota han er tiltalt for alvorlege. Dei handlar om blant anna valdtekt, vald i nære relasjonar og narkotika. Blir han dømd for dei mest alvorlege punkta, kan straffa bli fleire år i fengsel.

  I tillegg har han ei spesiell rolle i offentlegheita. Han er ein del av den utvida kongefamilien og har vore med på fleire offisielle arrangement saman med dei.

• Kvifor er Nora Haukland identifisert og ikkje dei andre?

  Retten har bestemt at av dei fornærma kan Nora Haukland identifiserast. Resten er omfatta av eit forbod mot å referera opplysningar som kan bidra til å identifisera dei. Av retten er dette konkretisert til å gjelda til dømes alder, bustad, yrke og omgangskrets.

• Kva har kongefamilien sagt?

  Slottet har bekrefta at kronprinsesse Mette-Marit var i kontakt med den såkalla Frogner-kvinna etter at sonen blei pågripen etter ei valdshending 4. august. Ho skal også ha rydda huset til sonen før den første arrestasjonen.

  Kronprinsparet har sagt at dei ikkje kjem til å vera til stades i rettssalen. Dei ynskjer heller ikkje å kommentera saka før ho er blitt tatt opp i retten.

  I «Året med kongefamilien» tok kronprinsessa eit oppgjer mot skuldingane dei hadde fått og kommenterte at ho var mest lei seg for kritikken dei har fått på korleis dei har handtert dette som foreldre. Ho ville ikkje seia kva konkrete skuldingar dei reagerte på.

• Kor får Høiby pengar frå?

  Kor Høiby får pengar frå er ikkje offentleg kjent.

  Det me veit ut frå skattelistene, er at Høiby har opplevd eit stort fall i både inntekt og formue dei siste åra. Dei skattepliktige inntektene til sonen til kronprinsessa var berre 48.065 kroner i 2024, meir enn ei halvering frå året før og eit fall på 80 prosent sidan 2022. Formuen låg på rundt 80.000 kroner, mot over 2 millionar kroner for tre år sidan.

  Det er også kjent at mormora til Marius Borg Høiby, Marit Tjessem (88), betalte over 530.000 kroner i sakskostnader etter at Høiby tapte søksmålet for å stansa boka «Hvite striper, sorte får».

• Kva skjedde med Julianne Snekkestad?

  Julianne Snekkestad var tidlegare kjærast med Høiby og stod fram med skuldingar om at han hadde vore valdeleg mot ho. Snekkestad fekk status som fornærma og blei avhøyrt i samband med politiet si etterforsking.

  Saka blei så lagt bort på grunn av manglande bevis. Ho valde å ikkje klaga på dette.

• Korleis vil NRK dekkja sjølve rettssaka?

  NRKs dekning frå rettssaka skal vera faktabasert, og det er dei vanlege nyheitskriteria som styrer kva som blir dekkja.

  Det betyr at nokre rettsdagar vil få mykje omtale, medan andre dagar kanskje ikkje blir omtala i det heile tatt.

  Før rettssaka startar, har NRK vurdert kor viktige dei ulike dagane i retten er. Dette er blitt gjort ut frå korleis retten har lagt opp saka og kva dei har sendt ut.

  Til dømes vil det vera stor interesse rundt forklaringa til Høiby, medan trafikksakene ikkje vil vera så nyheitsviktige.

  Dersom kongefamilien eller kongehuset på nokon måte blir tema i saka, vil det som utgangspunkt vera av stor nyheitsmessig verdi.