Redningsaksjon etter båtkantring: Ein person plukka opp – søker etter to til

Det er sett i gang redningsaksjon ved Kråkenes fyr etter ein skjærgårdsjeep vart funnen drivande med kjølen opp, melder politiet.

Klokka 20.39 melder dei at ein person er plukka opp av redningshelikopter.

– Søket held framleis på for fullt, seier Anja Bakken, kommunikasjonssjef i HRS klokka 20.53.

Ho er ikkje kjent med kor lenge dei tre personane kan ha vore i vatnet.

Hovudredningssentralen (HRS) bekreftar at dei starta søk etter tre personar i vatnet.

– Dette er ein utleigebåt. Utleigaren har stadfesta at båten gjekk ut tidlegare i dag med tre personar om bord.

Det seier Hans Jakob Gulliksen, redningsleiar i Hovudredningssentralen (HRS). Dei fekk fyrste melding klokka 18.23.

Fastbuande på Kråkenes melde frå

– Ein person på land lurte på om det kunne vere ein båt som låg opp ned, forklarer Gulliksen.

Atle Kråkenes bur på Kråkenes i Kinn kommune og fekk auge det han trudde var ein liten båt.

– Men eg synest det var for dårleg vêr til at nokon kunne vere ute og fiske i dag. Så såg eg litt nærare og då såg eg at båten låg opp ned. Då ringde eg redningsmannskap, seier Kråkenes.

Kort tid etter var fleire instansar på plass.

Redningsskøyter, redningshelikopter og politiet tek del i søket.

– 15 personar frå brannvesenet er på veg opp frå Måløy i båt, seier Børre Brekkvassmo, fungerande vaktkommandør i brannvesenet.

Frivillig mannskap er også kalla ut for å hjelpe til i søk langs land.