Redda naboane frå flammane: – Handlar om sekund

Eit bustadhus vart totalskadd etter ein brann i Tysvær natt til tysdag. Foto: Haugaland brann og redning

Sigbjørn og Kay Arne var begge heime då brannalarmen gjekk natt til tysdag. På minuttar fekk dei redda ut bebuarane som var inne i det brennande nabohuset.

• 

• Sara Nå Aga

Onsdag 11. desember kl. 11:56

I ei melding frå politiet 01:42 natt til tysdag vart det oppgitt at brannvesenet var i gang med sløkking etter at eit bustadhus stod i brann i Tysvær.

Ein time seinare opplyste politiet at ein brannmann var køyrt til sjukehus med røykskadar.

– Det går veldig bra med meg no. Eg har vore til sjekk på sjukehuset og det viste seg berre å vere irriterte luftvegar. Ingen røykforgifting, seier Sigbjørn Toskedal i telefon med VG.

Han og Kay Arne Wold jobbar som deltidsbrannmenn ved Aksdal brannstasjon i Tysvær. Då brannalarmen gjekk i natt, bestemte dei seg for å rykke rett til brannstaden for å vere brannvesenet sine auge og øyrer.

– Dette var rett i nabolaget og var kjappare enn å reise til brannstasjonen. Mannskapet som var på veg tok då med brannkleda mine, forklarer Sigbjørn.

<-Sigbjørn Toskedal

Deltidsbrannmann ved Aksdal brannstasjon i Tysvær.

Det som møtte Sigbjørn og Kaj Arne var eit bustadhus i full fyr.

Då starta redningsarbeidet.

– Det var full fyr på utsida, og flammane sto fem-seks meter i vêret, seier Sigbjørn og fortset.

– Me gjorde mange vurderingar ganske kjapt. Brannen var plassert slik at me hadde kontroll på at det ikkje var overhengande fare ved å gå inn der me gjekk. Me tenkte på vår egen sikkerheit, men også på dei som eventuelt var inne, seier han.

Bebuarane som då ikkje var gjort greie for vart vekt av Kay Arne som knuste eit vindauge for å kome seg inn i huset.

– Eg vurderte det som trygt, og fekk klarsignal frå befalet mitt. Eg hadde tatt den same avgjerda hundre av hundre gonger. Det handlar om å redde liv, seier Kay Arne.

<-Kay Arne Wold

Deltidsbrannmann ved Aksdal brannstasjon i Tysvær.

Ifølgje dei begge tok det få minutt frå alarmen gjekk til dei var på staden. Ytterlegare minutt gjekk før resten av brannmannskapet kom til staden.

– Det var veldig bra at det gjekk så fort som det gjorde. Det spelte nok ei rolle at me kom direkte til staden, seier Sigbjørn.

Huset fekk omfattande skader i brannen, og vert beskriven som totalskadd av både brann og vatn. Bebuarane som vart redda ut, vart køyrt til legevakt for ein sjekk.

Kay Arne og Sigbjørn roser kollegaene ved Aksdal brannstasjon. Foto: Alf-Einar Kvalavåg

Roser det lokale brannvesenet

Kay Arne jobbar til vanleg som lærar og Sigbjørn jobbar som branninspektør. Når alarmen går er dei anten heime eller på jobb.

Begge brannmennene roser sine kollegaer ved Aksdal brannstasjon og understrekar viktigheita av eit lokalt brannvesen.

– I natt fekk me eit veldig klart bilete på kor kjapt det kan gå. Det handlar ofte om sekund, seier Sigbjørn.

Dei oppmodar også andre til å melde seg til teneste i lokale brannkorps.

– Det er eit kjempeviktig arbeid og eit arbeid ein får gitt av seg sjølv. Som lokal brannmann kjenner du naboane, du veit kor folk bur, og kan kome deg raskt på plass, seier Kay Arne.

Les også: Brann i bolighus i Tysvær – brannmann til sykehus