Protestar etter Maduros valsiger: – Regjeringa skal falle

Innbyggarane i Venezuela starta veka med nyheita om at Nicolás Maduro hevda at han hadde vunne presidentvalet i landet.

Maduro har styrt Venezuela sidan 2013, og er ikkje populær hos mange. Sigerserklæringa har gjort mange oppgitte, fortvila og sinte.

Måndag ettermiddag lokal tid har det brote ut protestar i hovudstaden Caracas.

– Ho skal falle. Ho skal falle. Denne regjeringa skal falle, roper demonstrantar, melder nyheitsbyrået AFP.

Bilde viser demonstrantar med kaseroller i hendene som møtest av sikkerheitsstyrkar.

Maduro og Sosialistpartiet hevda å ha vunne valet med eit knapt fleirtal søndag. Det har ikkje opposisjonen tru på.

Sår tvil om resultatet

Måndag bad FNs generalsekretær António Guterres alle partar om å avstå frå vald:

– Generalsekretæren har tillit til at allt av ueinigheit om valet skal bli tatt opp og løysast fredeleg. Han ber alle venezuelanske leiarar og tilhengarane deira om å moderere seg, sa Guterres' talsperson Stéphane Dujarric.

Det er ikkje berre opposisjonen som har sådd tvil om valresultata. Det har også fleire av Venezuelas naboland og USA.

Administrasjonen til Joe Biden, USAs president har sagt at manipulering av valresultata har fjerna «alle truverd» frå Maduros sigerserklæring, ifølge Reuters.

Både Panama og Peru har kalla heim ambassadørane sine frå Venezuela og bryt diplomatiske band med landet.

Utanriksdepartementet i Argentina avviser også valsigeren til Maduro, skriv Reuters.

Venezuela har vore i ei djup økonomisk og politisk krise i rundt ti år. Landet har slite med hyperinflasjon og mangel på mat og medisinar. Nesten 8 millionar venezuelanarar har forlate landet sidan 2015.