Nye reglar blir omtalte som kvinnefiendtleg: – Det er heilt absurd

– Per definisjon er det vel meir kvinnefiendtleg enn det er «kvinnehjelp». Eg fattar ikkje heilt kva dei gamle gubbane i UCI har drive med. Eg vil nok seie at det er nærare kvinnefiendtleg og i alle fall småryttarfiendtleg.

Det seier det norske stortalentet Felix Ørn-Kristoff til NRK, som elles er veslebroren til Alexander Kristoff.

Han er tydeleg engasjert, og småforbanna, over regelendringa som blir innført frå 2026.

For torsdag kom beskjeden frå UCI som har skapt furore i sykkelfeltet.

Frå og med neste sesong må ryttarane ha eit styre som har ei breidde på minimum 40 centimeter. Reglane gjeld for landevegs- og grussyklar som ein skal konkurrere med i UCI-ritt.

– Dei nye krava og måla er jo mykje breiare enn skuldrene mine. Det blir ein veldig unaturleg posisjon. Det er ei stor ulempe for alle mindre ryttarar, seier Ingvild Gåskjenn til NRK. Ho er blant stjernene på det dansk/norske Uno-X-laget.

Ho syklar med eit styre som er 36 centimeter breitt – frå og med neste sesong må styrebreidda aukast med fire centimeter for at ho i det heile skal få deltatt i sykkelritt.

Etter innføringa har reaksjonane hagla.

«Desse nye reglane er sterkt diskriminerande mot kvinner og mindre menn», seier ei kjelde som jobbar tett på fleire av det største sykkellaget i verda til Bikeradar.

«Denne regelen øydelegg fullstendig for kvinnelege syklistar», skriv sykkelguruen Benji Naesen på X.

– Uforståeleg

Ifølge UCI er dei nye reglane innførte på grunn av omsyn til tryggleik.

Fleire ryttarar har begynt å sykle med smalare og smalare styre, dette for å sitte i ein meir aero posisjon. Det mest ekstreme eksempelet er Taco van der Hoorn. Han har hatt eit styre som berre har vore 32 centimeter breitt.

Dette kan, ifølge UCI, gå utover sikkerheita til ryttarar. Jo smalare styret er, jo vanskelegare kan det vere å manøvrere sykkelen.

• NRK har prøvd å komme i kontakt med UCI, foreløpig utan hell.

– Du ser berre dum ut på sykkelen og regelen gjer det verre for mange syklistar. Det er ein uforståeleg regel dei har laga, seier Ørn-Kristoff.

Fleire ryttarar som NRK har snakka med, er rykande ueinig i sikkerheit-argumentasjonen til UCI.

– Ein blir meir anstrengd i skuldrene, enn om ein sit i ein naturleg posisjon, seier Gåskjenn.

– Det er uforståeleg kvifor dei har sett akkurat dei dimensjonane på reglane, og kvifor dei har bestemt seg for at det må vere ei minimumsbreidde på 400 mm. Det er heilt absurd, seier Ørn-Kristoff.

– For generisk

NRKs sykkelekspert, Sondre Sørtveit, stiller seg også undrande til den vedtatte endringa.

– Det blir for generisk å sette ein slik regel med absolutte mål. Eg er einig i at svært smale styre for større ryttarar kan gå ut over handtering og dermed sikkerheita. Men at ei kvinne på 150-160cm skal ha same krav som ein høgreist mann meiner eg er feil, seier Sørtveit.

På motsett side står Marte Berg Edseth. Ho er lagvenninna til Gåskjenn og også ein del av Uno-X-laget.

– Det er vanskeleg å komme med så mykje kritikk, for det må komme ei grense ein stad. Det har kanskje gått litt over stokk og stein i nokre lag, som vel smale styre og vinklar hendlane inn, seier Edseth.

Men samtidig skulle ho ønske at det var ein viss forskjell på regelen:

Sjølvsagt, for små syklistar, så er 40 centimeter ganske breitt samanlikna for store herrar. Det kunne kanskje vore ein modifikasjon for folk som er mindre, seier ho.

Dei nye styrereglane er langt frå dei einaste nye reglane som forbundet har komme med.

Frå og med neste sesong er det ikkje lov å køyre med dei mest aero landevegshjelmane, det har komme eit tydelegare reglement på breidda av sykkelgaflane, og dessutan ei avgrensing på felgdjupna.