Noregs Bank overrasker «alle» - første rentekutt på fem år

På førehand trudde så godt som alle økonomar at styringsrenta nok ein gong skulle bli ståande i ro på 4,5 prosent.

Men så overrasker sentralbanksjef Ida Wolden Bache med rentekutt før sommaren.

– Prisveksten har avtatt sidan rentemøtet i mars, og det er utsikter til at prisveksten det næraste året vil bli lågare enn vi tidlegare såg føre oss. Ved å byrje ei forsiktig normalisering av styringsrenta no, legg vi til rette for at prisveksten kjem tilbake til inflasjonsmålet utan at vi bremsar økonomien meir enn naudsynt, seier Bache.

Renta har ikkje blitt satt ned sidan 2020, men har derimot blitt sett opp ei rekke gongar.

Heilt sidan desember 2023 har renta blitt ståande på 4,5 prosent, men denne junidagen skjer altså den første renteendringa på fleire år.

Men no signaliserer sentralbanken at renta også kan setjast vidare ned i løpet av året.

Men allereie med ein nedgang på 0,25 prosentpoeng, vil det vere kroner å spare om du har lån.

Har ein lån på 1 million kroner sparer ein 2500 kroner per år i rentekostnader, eller 208,33 kroner per månad.

Har du 4 millionar i lån vil du altså spare 10.000 kroner i året.

Overraska

Fleire økonomar trudde det første rentekuttet ville kome til hausten. Difor kjem dagens avgjerd overraskande på fleire når NRK ringer:

– Reint teknisk sett så skulle informasjonane vi har fått sidan mars tilseie at renta burde bli kutta i dag. Vi var likevel veldig skeptiske til om dei ville gjere det, seier Sara Midtgaard i Nordea.

– I utlandet har dei jo fått meir kontroll på prisveksten enn dei har her heime. Så vi synst dette var overraskande, seier ho.

Det synst også sjeføkonom Marius Gonsholt Hov i Handelsbanken.

– Det ser ut som Noregs Bank har vektlagt at prisveksten har vore lågare enn venta, seier Hov.

– Privatøkonomisk er dette svært gode nyheiter. Noregs Bank ser føre seg å sette renta vidare ned i år, seier han.

Ifølgje sjefstrateg Dane Cekov i Sparebank 1 Markets, tyder den ferske rentebana til Noregs Bank at det kan ligge an til eit nytt kutt i september og eitt i desember.

– Sjølv om lånetakarar no kan sprette sjampanjen med god grunn, tvilar vi på at Noregs Bank kjem til å gjennomføre alle dei planlagte rentekutta. Vi trur på eit kutt til i september, men er usikre på om renta skal ned i desember, seier Cekov.

Ikkje overraskande svekker krona seg mot fleire valutaer etter renteavgjerda. Renta fungerer som ei avkastning på å investere i kroner, og når den går ned, så sit ein igjen med litt mindre etter ei slik investering.