Nordtun eller Listhaug som kunnskaps­minister? Valet er enkelt!

Sylvi Listhaug (Frp) ønsker å overta jobben som Kari Nessa Nordtun (Ap) har. Foto: Carina Johansen / NTB

DEBATT: Sylvi Listhaug vil bli kunnskapsminister. Då skal ho hiva alle bråkebøttene ut av klasserommet og senda dei til spesialskular. Ho skal innføra nivådeling i alle viktige fag slik at dei flinke får læra i fred og sleppa å ta omsyn til alle sinkene.

Ho vil oppretta mange fleire private skular slik at dei kristne, dei rike og dei som er flinke i idrett, får gå på sine eigne skular og sleppa å forholda seg til heidningar, humanetikarar, muslimar, fattigfolk, overvektige og latsabbar. Alt dette vil føra til ro i skulen, betre læringsmiljø og meir læring, seier Sylvi.

Erfaring og forsking

Forskarar og skulefolk veit betre. Dei veit at tiltaka Listhaug vil innføra, er prøvde før med svært dårlege resultat. I Debatten på NRK 22. mai slo skuleforskar Thomas Nordal og leiar for Utdanningsforbundet, Geir Røsvoll fast at nivådeling og segregering fører til stigmatisering av elevgrupper og mindre læring for alle. Stilt overfor skuleforskaren og fagforeninsgleiaren sin faktabaserte kunnskap, heldt Listhaug fast på sitt. Ho vil ikkje basera skulepolitikken på forsking og erfaring frå klasserommet. Skrekkhistorier om enkeltelevar og populistisk synsing skal leggjast til grunn dersom ho blir kunnskapsminister.

Me som var elevar i den nivådelte ungdomsskulen på 1960- og 70-talet, kan og fortelja Listhaug kor øydeleggjande kursplan-systemet var. Særleg elevane på lågaste kursplan blei hardt råka av stigmatisering og sterkt redusert læringsutbytte. Dei blei stempla som dumme, kjende seg ofte mindreverdige ikkje berre i ungdomstida, men og i vaksenlivet.

Nordtun eller Listhaug?

Landet vårt har nå ein kunnskapsminister som baserer skulepolitikken sin på forsking og erfaring frå klasserommet. Kari Nessa Nordtun er handlekraftig samtidig som ho er lyttande og har god dialog med alle aktørane på skulefeltet. På rekordtid har ho gjennomført ei lang rekkje lovendringar og reformer som blir helsa velkomen av eit stort fleirtal. Alle reformene er baserte på ei grunnleggjande forståing av kor viktig fellesskulen er i det norske samfunnet. At alle elevar møtest på den same skulen skaper forståing og tillit. Dette er avgjerande faktorar for eit godt og produktivt arbeidsliv; for å skapa verdiar. Fellesskulen er limet i samfunnet vårt.

Sylvi Listhaug snakkar aldri positivt om fellesskulen. Ho vil ha ein skulepolitikk som riv ned fellesskulen og skaper større forskjellar.

Nordtun eller Listhaug – kan det vera eit vanskeleg val?