Mann i 20-åra sikta for drapsforsøk etter valdshending på Bømlo i natt

Rett over klokka 1 i natt fekk politiet melding om ei valdshending på ei adresse sør i Bømlo kommune i Vestland.

– Politiet rykte ut saman med ambulanse og brannvesenet. Der kom politiet i kontakt med to personar i 20-åra, seier politiadvokat Tonje Ravndal i Sør-Vest politidistrikt.

Ein av mennene vart frakta til Haukeland universitetssjukehus med luftambulanse.

Den andre vart arrestert, og seinare frakta til Haugesund politistasjon.

– Han er sikta for drapsforsøk, seier Ravndal.

Ho ynskjer ikkje å kommentera saka ytterlegare. Heller ikkje om det er gjort beslag i eventuelle våpen eller gjenstandar.

– Den fornærma var medviten då han vart frakta til sjukehus. Eg har ikkje ytterlegare opplysningar om hans tilstand, seier jourhavande.

Politiet skal gjera krimtekniske undersøkingar på staden.

Det skal ikkje ha vore andre personar til stades på adressa.