Kritiserer skattegrep på bustad: «Urimeleg», «vanvitig» og «urettferdig»

Norske bustadinvestorar har tent rått på auka bustadprisar.

Når desse bustadane bli selt, skal eigentleg gevinsten frå auka verdiar skattleggast med 22 prosent. Men ved å gjere leilegheiter om til burettslag, kan bustadinvestorar sleppe denne skatten.

Dei som har brukt burettslagsmodellen mest er Heimstaden. Det gjer at dei slepp skatt på massesal av bustadar.

Berre sidan i sommar har dei selt burettslagsleilegheiter for 352 millionar kroner, har NRK vist.

Heimstaden sel leilegheiter fortløpande. Etter sommaren har dei selt minst 75 burettslagsleilegheiter, har NRK vist. I tillegg har dei nesten 2000 leilegheiter som nyleg er omgjorde til burettslag.

Heimstaden er kontrollert av Noregs største bustadinvestor, Ivar Tollefsen.

– Urimeleg

– Det verkar urimeleg at eit selskap som eig leilegheiter kan gjere det om til burettslag og hente ut store gevinstar utan å betale skatt, seier høgrepolitikar Helge Orten.

Orten sit i finanskomiteen på Stortinget.

– Vi er opptatte av størst mogleg likebehandling ved skattlegging av gevinstar, slik at det samla skattetrykket kan haldast på eit moderat nivå.

Finansminister Trygve Slagsvold Vedum har kalla bruken av burettslagsmodellen for skattefri gevinstar «uønskt», men har ikkje innført tiltak.

Statssekretær Erlend Grimstad har nyleg uttalt til NRK at ei løysing er «under arbeid», men at det er for tidleg å seie når ho vil komme.

– Vi merkar oss at regjeringa jobbar med løysingar, men det er litt skuffande at dei ikkje kan seie noko om når arbeidet vil vere ferdig, seier Orten i Høgre.

– Vanvitig provoserande

I juli skreiv Finansavisen om Heimstadens planlagde nedsal, og korleis burettslagsmodellen ville gjere gevinstane skattefrie.

Då spurde Raudt-leiar Marie Sneve Martinussen kva finansministeren ville gjere. Vedum svarte at han ville vurdere «korleis slik uønskt skatteplanlegging kan motverkast».

– Eg har ikkje sett så mykje til dei vurderingane, og det renn jo ut pengar. Ein må prøve å tette det før milliardane har forsvunne frå fellesskapen, seier Raudt-leiaren til NRK.

– Har du forståing for at det tek tid frå regjeringas side?

– Ja, eg skjønner at det ikkje kan skje på dagen. Men eksempelet med Tollefsen har vore kjent i fleire månadar no. Når det dukkar opp på nytt igjen, forventar eg at ein har noko tydelegare svar.

Det viktigaste for Raudt er å få skatteholet tetta, seier Martinussen.

– Det er vanvitig provoserande for bussjåførar og bygningsarbeidarar som betaler skatten sin kvar månad, at det finst sånne hol. Når nokon planlegg seg unna skatt, må andre plukke opp rekninga. Og det blir fort folk flest, seier ho.

Peikar på positiv side

Når ein utleigar sel mange leilegheiter, betyr det at fleire får høve til å kjøpe ein bustad, seier Siri Gåsemyr Staalesen (Ap) om Heimstadens nedsal. At det blir selt som burettslagsleilegheiter, meiner ho har ei positiv side.

– Burettslagsmodellen hindrar gjennomtrekk og framleige. Burettslag skapar meir stabile, trygge bumiljø samanlikna med sjølveigarbygardar der folk leiger ut leilegheitene, seier Staalesen, som er bustadpolitisk talsperson i Arbeidarpartiet.

– Burettslagsmodellen blir brukt til å unngå skatt på gevinstar frå verdistigning. Kva tenker du om det?

– Det er urettferdig når bustadmilliardærar ikkje bidreg til fellesskapen ved å betale skatt, men i staden finn smotthol i regelverket. Regjeringa jobbar no med å vurdere korleis slik uønskt skatteplanlegging kan motverkast, svarar Staalesen.

– Heimstaden sel bustadar i høgt tempo. Kor lenge kan Ap vente på ei løysing?

– Det tek den tida det tek, men vi er utolmodige og forventar at regjeringa kjem tilbake med ei løysing så raskt som mogleg, svarer ho.

Heimstaden har fått tilsende politikarens utsegn til NRK. Selskapet har ikkje kommentert dei.

Heimstaden har ikkje ønskt å svare på om denne sal via burettslag er skattemotivert eller kor mykje dei eventuelt sparer på dette.