Israel angreip sjukehus i Gaza by

Rundt midnatt lokal tid angreip den israelske hæren (IDF) Al-Ahli Baptist Hospital etter å ha fått pasientar og helsepersonell til å evakuere ut i mørket.

Ein pasient skal ha døydd under evakueringa, ifølge ein akuttlege på sjukehuset.

Al-Jazeera skriv at tre personar døydde under evakueringa.

Pasientane på sjukehuset var mellom anna skadde etter eit israelsk angrep mot ei bustadblokk tidlegare denne veka.

Den israelske hæren (IDF) stadfestar angrepet, og hevdar at sjukehuset var kommandosentral for Hamas-krigarar. Angrepet har vore ein koordinert aksjon frå IDF og etterretningstenesta Shin Bet.

IDF har gjentatte gongar angripe sjukehus i Gaza og forklart dette med at Hamas gøymer seg på sjukehusa. Dei har i få tilfelle lagt fram det dei seier er bevis for dette.

Store øydeleggingar

Al-Ahli Baptist Hospital var ein liten helseklinikk før krigen, men etter at Al-Shifa og fleire andre sjukehus i Gaza by har blitt totalt eller delvis øydelagde, har det blitt hovudsjukehuset i byen.

Al Jazeera-journalist Hani Mahmoud har vore inne på sjukehuset i morgontimane, og skildrar synet som møtte han der.

– Sjukehuset er totalt ute av drift. Pasientar i Nord-Gaza som treng helsehjelp har no ingen ordentlege sjukehus å dra til, skriv han.

Også kirurg på sjukehuset, Fadel Naim, skriv på X at store delar av sjukehuset er øydelagd, mellom anna akuttmottaket.

– Dette påverkar meir enn 100 pasientar og fleire helsepersonell, skriv han.

Ut i all hast

Ifølge Naim dei fekk ei åtvaring om angrepet før det trefte.

Videoar frå sosiale medium viser helsepersonell og pasientar som evakuerer ut frå Al-Ahli Baptist Hospital i all hast i mørket, før angrepet treff.

Ein lokal journalist som BBC har snakka med, fortel at hen var på sjukehuset då IDF ringde ein akuttlege og bad dei evakuere sjukehuset i løpet av 20 minutt.

Fleire flykta også frå bakgarden til sjukehuset, der internt fordrivne har søkt ly.

Interessert i utanriksstoff? Høyr vår nyaste episode av Urix: