Isah før Stavanger-konsertane: – Som om me er på ei piratskute

Komponist Eirik Berge frå Sandnes har ein internasjonal karriere. I vår kjem eit nytt høgdepunkt for han i Wien.

Eirik Berge er tilbake på heimtraktene. Bak han gjer Stavanger Symfoniorkester seg klar til siste øving før Isah-konserten. Foto: Jon Ingemundsen

Rapparen Isah kjem inn på scenen, kledd i eit kvitt, langhåra antrekk. Auga er knapt synlege bak briller med berre gliper til opning.

Før han blei klar for prøven, klokka 10 fredag formiddag, skaffa personalet han ingefærshot, noko som ifølgje artisten både får bort slim og sørgjer for at han er vaken. No er han klar til å få alt til å sitja før konserten klokka 20 same kveld, og laurdagens reprise.