Heiter eigentleg ikkje «Fnu»

– Vi har ikkje fornamn, seier Fnu Nidunjianzan.

Eller berre Nidunjianzan som han faktisk heiter.

I helga var han med på det kinesiske laget som tapte for Casper Ruud og Noreg i Davis Cup i tennis.

Det var også der at NRKs journalist på staden stussa over det smått uvanlege fornamnet «Fnu».

Svaret vi fekk er at «Fnu» nemleg er ei forkorting for:

First name unknown.

Eller på norsk: ukjent fornamn.

Amerikanske reglar

For i Tibet i Kina, der Fnu Nidunjianzan er frå, er det vanlege at ein berre har eitt namn.

– Alle i Tibet, vi har ikkje fornamn, vi har berre etternamn. Så mamma, eg, pappa, vi har alle ulike etternamn, seier Nidunjianzan til NRK.

Dei siste fire åra har han studert ved prestisjeuniversitetet Princeton i New Jersey, USA.

Og det var nettopp da han skulle starte på universitetet i USA at han enda opp med fornamnet «Fnu».

– I USA, så må ein ha eit fornamn til skulerapportar eller kva som helst, forklarar 22-åringen til NRK.

– Så eg trengde liksom eit offisielt fornamn frå myndigheitene, og det dei gav meg var Fnu, som står for «First Name Unknown».

– Så First Name Unknown, FNU, det er namnet ditt nå?

– Det er namnet mitt, ja, seier Fnu Nidunjianzan smått humrande til NRK.

Overraska verdsstjerne

Nidunjianzan seier sjølv at han er frå Lhasa i Tibet i Kina.

Tibet har sjølvstyre, men det ligg under Kina.

Difor er det det kinesiske flagget som Nidunjianzan spelar med på brystet i internasjonale konkurransar.

22-åringen er den fyrste med bakgrunn frå Tibet som nokosinne har teke ATP-poeng, og han satsar for fullt på tennis nå når han er ferdig med utdanninga frå Princeton-universitetet.

Saman med Nidunjianzan på det kinesiske laget spelte Zhizhen Zhang. Tidenes beste kinesiske tennisspelar som har vore heilt oppe på 31.-plass på verdsrankinga.

Da NRK møter verdsstjerna Zhang og spør om namnet til lagkameraten, får han seg ei overrasking.

– Er det sant? Heiter han ikkje Fnu? Det skal eg gå og prate med han om, seier Zhang til NRK.

Tibetansk tradisjon

Namgyal Tsomo Svenningsen i Den norske Tibet-komité bekreftar til NRK at i Tibet er det den gjeldande tradisjonen at ein berre har eitt namn.

– Mitt namn er for eksempel Namgyal Tsomo. Det er mitt fornamn. Og så er eg gift her i Noreg i tillegg, seier Svenningsen til NRK.

Ho forklarar at mange tibetanarar innimellom berre har registrert namnet sitt dobbelt. Slik at fornamn og etternamn blir det same.

I tennisspelaren Nidunjianzan sitt tilfelle ville det da vorte:

«Nidunjianzan Nidunjianzan»

Svenningsen tykkjer det er litt snedig med tilfellet Fnu Nidunjianzan, men ho fortel at ho også har høyrd om folk som har fått registrert etternamnet sitt som «Lnu»: «Last name unknown».

Sjølv har Fnu Nidunjianzan ingen problem med at han blir kjend som «Fnu».

– Viss nokon ropar Fnu, snur du deg?

– Å, heilt sikkert, skrattar Nidunjianzan og held fram:

– Ingen andre rundt meg er «Fnu», så eg veit at dei ropar heilt sikkert på meg, avsluttar tennistalentet smilande.