Fleire stengde vegar og innstilte ferjer

Den sterke vinden og det gule farevarselet skaper utfordringar på vegane, seier trafikkoperatør Rolf Einar Vågheim til NRK måndag morgon.

Det har gått ein snøskred i Lodalen over vegen, like før Bødalen.

– Vegen er stengt akkurat no. Entreprenør er på veg ut, seier Vågheim til NRK 07.15.

Han har ikkje informasjon per no om kor stort raset er.

Kolonne og stengte vegar

Det er sendt ut gult farevarsel om sterk vind. Mellom anna blei det på Folgefonna i natt målt orkan i kasta med over 50 m/s, melder Hardanger Folkeblad.

Hardangerbrua og Sotrabrua i fare for å stenge på morgonkvisten grunna sterk vind.

På Hardangerbrua rv. 13 i Ulvik/Eidfjord er det no stiv kuling med sterk kuling i kasta.

Fleire fjellovergangar er råka av vêret.

Rv. 13 Vikafjellet er stengt.

Fv. 50 Hol – Aurland er også stengt.

Over E134 Haukelifjell er det kolonnekøyring.

Det same gjeld for alle køyretøy på riksveg 7 Hardangervidda ved Hol/Eidfjord.

Innstilte ferjer

Det er også fleire innstilte ferjer.

• Gjermundshamn – Varaldsøy – Årsnes.
• Mortavika-Arsvågen E39- sambandet. To av tre ferjer innstilt. Den siste går til Hanasand i staden for Mortavika på grunn av uvêret.
• Hjellestad – Klokkarvik – Bjelkarøy- Lerøy: Rundtur med avgang klokka 06:05 frå Klokkarvik er innstilt. Ny vurdering klokka 08:00.
• Hurtigbåten mellom Florø og Måløy går ikkje til kai i Smørhamn på morgonkvisten. Det kan verte forseinkingar.
• Ferjesambandet Stårheim-Isane innstilt. Frå Stårheim gjeld dette avgangen 06:00 og 06:45. Frå Isane 06:20 og 07:05, melder Fjord1.

Flytrafikken råka

Også flytrafikken er råka.

Equinor melder om forseinkingar i helikoptertrafikken ut i Nordsjøen grunna utfordrande vêrforhold.

Selskapet ber likevel alle passasjerar om å møte opp til vanleg tid.

På Flesland er to SAS-avgangar frå Bergen til Stavanger innstilt. Det er også fleire fly som er forsinka.

Fleire fly til Bergen er også innstilt, mellom anna tre fly frå Stavanger.

På Sogndal lufthamn er det så langt registrert to forseinkingar. Dette gjeld flyet til Bergen som skulle ha gått klokka 06.45. Det er utsett til 08.05, ifølge Avinor.

Den same avgangen skulle også ha gått til Florø, men blir utsett til klokka 08.20.

Flyet frå Bergen som skulle landa 08.45 er kansellert.

Frå kystbyen Florø er avgangen til Bergen klokka 09.25 kansellert. Avgangen til Bergen som skulle ha vore i lufta klokka 07.25, er utsett til klokka 10.25.

Vinden skal halde på utover dagen, og Vegtrafikksentralen trur det vil kome inn endå fleire meldingar.

Dei ber folk vere ekstra varsame og følge godt med.

– Sjølv om det er plussgrader, kan det framleis vere glatt, minner trafikkoperatør Rolf Einar Vågheim om.

Her kan du sjekke oppdatert status på vegane.

Skjerpar beredskapen

Farevarsla om svært kraftige vindkast gjer til at BKK har skjerpa beredskapen sin for å ta hand om eventuelle tre eller andre gjenstandar som kan blåse over straumlinjer.

– Dei førebelse vêrvarsla tyder ikkje på like sterk vind som kva vi opplevde under Amy, men vindretninga er den same. Men konsekvensar av straumbrot vinterstid kan vere større, særleg med tanke på kuldeperioden vi har vore gjennom, seier Henrik Wiedswang Horjen, kommunikasjonsrådgivar i BKK i ei pressemelding.