Byrådskaos i Trondheim: – Ein uavklart situasjon

– Det er klart det er ein uavklart situasjon med tanke på kva som vil skje rundt byrådet dei neste vekene, og det er krevjande.

Det seier den ferske byrådsleiaren Kjetil Reinskou (H).

Tysdag blei det klart at Høgre braut forhandlingane om ny trafikkplan for Trondheim sentrum.

Same kveld kom ultimatumet frå byrådspartnar MDG: Dersom Høgre ikkje snur, går MDG ut av byrådet.

– Uavklart situasjon

Kva som skjer vidare med byrådet er dermed usikkert.

– Er du redd for å bli felt?

– Dette er ei stilling ein aldri kan vere sikker på å få fortsette i, seier byrådsleiaren.

– Eg meiner vi har gjort ein såpass god jobb for Trondheim at eg har veldig lyst til å fortsette.

Han fortel at han ønsker å finne løysingar på byrådssamarbeidet.

Kva som skjer dersom MDG trekk seg frå samarbeidet er enno ikkje avklart.

– Vi sit som eit mindretalsbyråd i dag også, og målet mitt er å styre vidare.

– Eg er budd på å styre skuta vidare så lenge ein ikkje blir felt.

Da Høgre braut forhandlingane tysdag, peikte dei mellom anna på at dei ønsker ein parkeringskjellar under bakken i sentrum. Det fekk dei ikkje dei andre partia med seg på.

– Det kom krav i forhandlingane som vi ikkje kunne stå inne for og som flytta heilskapen i planen på ein sånn måte at den ikkje blei mogleg for oss å gå med på, seier gruppeleiar i Høgre, Mats Ramo.

– Løftebrot av Høgre

– Det er Høgre som har eit løftebrot her. Det er dei som vel å gå så langt og lagar denne dramatiske situasjonen, seier gruppeleiar i MDG, Tore Dyrendahl.

Byrådet beståande av Høgre, MDG og Venstre la fram sitt forslag til ny samferdselsplan for Trondheim i november.

Planen går ut på å dele sentrum inn i tre soner. Dersom ein køyrer inn i sentrum i ei sone, så må ein halde seg i same sone og kan ikkje krysse over i dei andre sonene.

Målet er å stanse bilar frå å køyre gjennom sentrum.

– Det har vore klart heile vegen kva vi har ønskt å gjere med Midtbyen og sentrum, seier Dyrendahl.

Han peiker på at Høgre var med på å legge fram planforslaget.

– Så det er dei som gjer eit drastisk grep her og snur 180 gradar om noko vi har jobba med lenge.

Dyrendahl fortel at MDG ønsker å kome til einigheit med byrådspartnarane.

– Dersom ein finn ei løysing med sektorisert køyremønster så trur eg vi kan få til noko. Vi vil gjerne ha dialog med Høgre om det.

– Kinkig at Høgre braut samtalane

Forutan MDG og Høgre, består byrådssamarbeidet også av Venstre.

– Det er kinkig at Høgre braut samtalane om ny samferdselsplan, seier Erling Moe.

Hen er gruppeleiar for Venstre og fungerande ordførar i Trondheim.

– Men Venstre sitt utgangspunkt er at det er lagt fram ein god plan. Så kan det sjølvsagt bli gjort nokre tilpassingar, og at vi forsøker å finne ei løysing.

Moe seier han legg til grunn at byrådspartia blir einige før samferdselsplanen skal bli behandla av bystyret i slutten av januar.

– Vi må snakke saman og finne ei løysing, det er vår plikt. Venstre meiner vi må gjere noko med gjennomkøyringstrafikken i Trondheim.

Klare til å ta over

– Det blir dessverre meir og meir openbert at byrådet og partia som samarbeider, ikkje er i stand til å styre byen. Det ser vi eksempel på gong etter gong etter gong.

Det seier Jørn Arve Flått, gruppeleiar for Trondheim Arbeidarparti.

Flått seier det er opp til Høgre og MDG å sjå om dei kan kome fram til ei einigheit.

– Korleis det skal vere mogleg å kome fram til einigheit etter dei utspela som begge partia har hatt, det er vanskeleg å sjå for seg.

– Dersom MDG trekk seg og byrådet ikkje kan styre lenger, er de i Ap klar til å sette saman eit nytt byråd?

– Vi er klare, men vi er jo sjølvsagt også avhengige av å finne eit fleirtal og ha eit fleirtal bak oss.