40 meter lang sprekk stenger E39 ved Ålgård

– Det er snakk om 40 meter lange sprekker, seier operasjonsleiar Rune Tallaksen i Sør-Vest politidistrikt.

Han seier det er fare for at det spreier ut. Etter føre-var prinsipp stengjast derfor E39 på grunn av fare for jordskred. Omveg er no skilta for bilistar.

Sprekkene er på ein veg eit lite stykke over E39 ved Kongeparken på Ålgård.

Bygg i nærleiken blir no evakuerte.

Redde for jordras

– Er det fare for at noko kan rase ned?

– Det er det vi er redde for. For å vere på den sikre sidan, tar vi ingen sjansar, seier innsatsleiar Morten Helland i Sør-Vest politidistrikt til NRK på staden.

Vegvesen og geologar er på veg.

– Vi veit ikkje kor lenge vegen blir stengt, det må geologane avgjere, seier Helland.

Det er ingen bygningar som er skadd. Men Uno X stasjonen rett ved er stengt på grunn av situasjonen.

Politiet har fleire ressursar på staden for å hjelpe med trafikkavviklinga.

Ikkje høve for evakuering

Dei siste dagane har det vore mykje nedbør i Rogaland. Og kommunen gjer fleire vurderingar kring situasjonen.

– Vi er redde for at massane skal skli ut på vegen, seier kommunalsjef i Gjesdal kommune, Hilde Gunn Bjelde.

Kommunen vurderer no å flytte brannstasjonen til eit midlertidig lokale, ettersom sprekka ligg rett ved brannstasjonen på Ålgård.