14 land fordømer Israel for utviding av busettingar

Noreg er blant 14 land som fordømer at Israel har godkjent nye busettingar på den okkuperte Vestbreidda.

Landa ber Israel trekke avgjerda tilbake og stanse vidare utviding.

Ifølge FN er omfanget av israelske busettingar i dei okkuperte palestinske områda no det største sidan 2017.

Minister vil hindre etableringa av palestinsk stat

Avgjerda blei kunngjord sundag av finansminister Bezalel Smotrich.

Han uttalte at busettingane skal hindre etableringa av ein palestinsk stat.

Smotrich har tidlegare uttalt at «den palestinske staten blir viska ut, ikkje med slagord, men med handlingar.»

Palestinske styresmakter har på si side sagt at vidare busettingar gjer ein levedyktig palestinsk stat umogleg.

Ei tostatsløysing inneber at Israel og Palestina blir to eigne statar som lever side om side innanfor anerkjende grenser.

Storbritannia, Canada, Tyskland, Belgia, Danmark, Frankrike, Italia, Island, Irland, Japan, Malta, Nederland og Spania er blant landa som stiller seg bak fordøminga.

– Vi minner om vår klare motstand mot alle former for anneksjon og utviding av busettingspolitikken, inkludert godkjenning av E1-busettinga og tusenvis av nye bueiningar, heiter det i ei felles fråsegn.

Vidare skriv landa at «slike einsidige handlingar bryt med folkeretten og kan bidra til meir uro i regionen».

Landa understrekar samstundes støtta til palestinarane sin rett til sjølvbestemming og ei varig fred basert på ei tostatsløysing.

FN har fleire gonger slått fast at busettingane er i strid med folkeretten.

Utanriksminister Espen Barth Eide (Ap) uttalte tidlegare i desember at dei nye busettingsplanane utgjer ei betydeleg trussel mot fred og tryggleik.

NRK har bedt utanriksdepartementet (UD) om ein kommentar.

Avviser kritikken

Israel avviser fordøminga og meiner kritikken er diskriminerande mot jødar, melder AFP.

Utanriksminister Gideon Saar seier utanlandske styresmakter ikkje har rett til å gripe inn i kvar jødar kan bu.

– Utanlandske regjeringar skal ikkje avgrense retten jødar har til å bu i Israels land. Slike krav er moralsk feil og diskriminerande mot jødar, seier Saar.

Han viser til at det israelske tryggleikskabinettet har vedtatt å opprette 11 nye busettingar og formalisere åtte eksisterande.

– Vedtaket er mellom anna meint å møte dei tryggleikstruslane Israel står overfor, seier utanriksministeren.

Omstridd plan

I mai godkjende Israel den omstridde utbyggingsplanen i området E1.

Planen vil dele den okkuperte Vestbreidda i to og isolere Aust-Jerusalem, ifølge den israelske avisa Haaretz.

Det er planlagt over 3.400 bustader i ei busetjing knytt til Ma’ale Adumim aust for Aust-Jerusalem.

Planen har i mange år vore på vent på grunn av internasjonalt press.

Kritikarar meiner utbygginga kan gjere ei tostatsløysing umogleg.

Tidlegare i august sa Smotrich at planen ville «sikre at Europas hyklerske leiarar ikkje har noko å anerkjenne innan september».