Bonden Jørn har slått graset rekordtidleg – gir håp om meir fôr

– Vanlegvis slår eg graset først rundt sankthans, seier Jørn Skoe.

Han er mjølkebonde på Vinstra i Gudbrandsdalen og er allereie ferdig med første slåtten.

Varmen og tørken frå mai førte til at Skoe kunne slå graset omtrent tre veker tidlegare enn normalt.

– Det er rekordtidleg, seier bonden i Gudbrandsdalen.

• Førre månad var den varmaste mai-månaden på lenge. Det gjer klimaforskarar uroa.

Rekordtidleg fleire stader

Fagkoordinator for grovfôr i Norsk landbruksrådgiving (NLR), Ragnhild Borchsenius, stadfestar at ein i år kunne kutte graset tidlegare enn normalt fleire stader.

– Det er rekordtidleg slått i heile landet sør for Saltfjellet, seier ho.

Ho har snakka med fleire landbruksrådgivarar rundt om i landet med lang fartstid som seier at dei aldri har opplevd ein så tidleg førstelått.

Samstundes er det også store variasjonar.

– Der ein har slått i låglandet kan det vere at det framleis er for tidleg i høgda. Snøen smelta likevel raskt i høgda, så det er rekordtidleg våronn også der, forklarer ho.

Men den tidlege førstelåtten har også skapt utfordringar for bønder.

– Våren er ei travel tid for bønder og den vart ekstra travel når førstelåtten vart skunda fram med omtrent to veker, seier ho.

• Les også om bonden som tok sistelåtten unormalt seint – i desember!

– Ekstremvêr

Klimaforskar Bob Van Oort ved Cicero, Senter for klimaforsking, omtalar pangstarten på sommaren som ekstrem.

– Denne våren har vore prega av ei form for ekstremvêr med unormal varme og tørke.

– Vi har alltid naturlege variasjonar i vêret, men maitemperaturane i år tangerer varmerekorden for mai 2018, seier han.

Han meiner dei høge temperaturane i mai har samanheng med klimaendringane.

– Når vi snakkar om vêrekstrem og rekordar, er det meir sannsynleg at desse kan knytast opp mot klimaendringar, seier han.

• Også fleire grønsaker har blitt rekordraskt modne i år, men det tørre vêret har også skapt hovudbry for mange bønder.

Håpar på tredje slått

Ekstremvêr til trass, klimaforskaren meiner vêret så langt i sommar er positivt for landbruket. I alle fall for dei som har hatt tilgang til vatn.

– Det varme og tørre vêret er etter mitt syn positivt sidan ein kanskje rekk å få inn ein tredje slått i løpet av sommaren, men det er ikkje utan utfordringar for enkelte, seier han.

Nettopp det å slå graset tre gonger i år, er noko bonden i Gudbrandsdalen håpar på.

Vanlegvis slår han graset to gonger i løpet av sesongen. Med ein slått til, kan han få meir fôr til dyra.

– Med det vêret vi har hatt så langt i år kan det sjå ut til at vi kjem til å slå graset tre gonger her òg, seier Skoe.

Likevel er han klar på at det fort kan endre seg.

– Det kan hende det blir litt for tøft utover i sesongen, men det får vi sjå, seier Skoe.

• Fekk du med deg denne saka? Mai var den tolvte månaden på rad med varmerekord.