Tre tiltalt etter funn av cannabisplantasje: Skal ha stole straum for 350.000

I over to år skal far og son ha drive ei familiebedrift litt utanom det vanlege.

På eit lokale i Fana og på ein gard på Osterøy skal mennene ha dyrka fram fleire hundre cannabisplantar.

Faren i 40-åra og sonen i 20-åra har begge austeuropeisk bakgrunn.

Dei er tiltalte for grovt narkotikaregelbrot og den såkalla mafiaparagrafen. Det vil seie at dei straffbare handlingane er utførte som ein del av organisert kriminalitet.

I tillegg skal den eldste mannen ha tjuvkopla seg på BKK sitt straumnett og stole straum for totalt 348.668 kroner.

Politiet meiner handlingane speglar av eit profesjonelt preg.

– Dette er openbert ei alvorleg sak, seier statsadvokat, Ellen Cathrine Greve til NRK.

Meiner kvinne la til rette

På garden på Osterøy skal verksemda ha halde på i om lag åtte månader i 2024.

På den tida klarte dei å dyrke fram over 350 cannabisplanter og sat igjen med om lag «30,8 kg røykbart materiale», ifølge tiltalen.

Mennene sit per i dag fengsla.

Ei norsk kvinne i 40-åra er òg tiltalt for å ha lagt til rette for verksemda på Osterøy.

– Ho er berre involvert på den eine staden, og ein meiner at ho primært har medverka til dyrkinga ved å leige ut, seier Greve.

I motsetnad til mennene er ikkje kvinna tiltalt for medverking til organisert kriminalitet.

Politiet meiner òg at det er ein fjerdemann involvert i saka. Han skal per i dag halde til i England. Det skal vere eit nytt rettsmøte i desember om utlevering av mannen.

Det er sett av tre veker i retten til dei to sakene.