Palestinarar og israelarar protesterer saman – ein veg til fred?

På ei elles anonym rundkøyring i Betlehem skjer det noko heilt unikt – kvar fredag.

Plakatar med slagordet «Det finst ein annan veg» prydar den vesle rundkøyringa.

Først på arabisk. Så hebraisk. Så engelsk.

Palestinarar og israelarar har ein bodskap til verda: dei står saman om å skape fred mellom dei to folkeslaga.

Men dei israelske styrkane på Vestbreidda er lite begeistra.

Målet: fredeleg sameksistens

– For det det er verdt blir eg håpefull når israelarar og palestinarar møtest her, sjølv etter blodbadet vi har sett i Gaza, seier Avner Wishnitzer.

Han jobbar med den israelske delen av den aktivistiske organisasjonen Combatants for Peace (CFP). Saman med palestinarar, håpar han og kollegaene å foreine dei to folkeslaga gjennom felles protestar og oliventreplanting.

NRK har bede CFP om hjelp til å filme, ta bilete og stille NRK sine spørsmål til demonstrantane.

Fleire tiår med valdeleg israelsk okkupasjon på Vestbreidda, terrorangrepet 7. oktober 2023 og ein to år lang krig i Gaza har etterlate opne sår.

Likevel trur CFP på fredeleg sameksistens, fred og at Israel ikkje lenger okkuperer dei palestinske områda. Det er motivasjonen for vekevise protestar i Betlehem – ein by både israelarar og palestinarar har tilgang til.

– Trur du fred er mogeleg mellom Israel og Palestina?

– Ja. Fred mellom folka våre er naturleg. Vi har gjort det lenge gjennom historia, seier palestinske Suliman Al Khatieb.

Al Khatieb er palestinar og jobbar for den palestinske eininga i CFP. Han er takksam for å sjå at det er israelarar som står opp mot den israelske okkupasjonen på Vestbreidda.

– At vi samlar oss her i dag, israelarar og palestinarar, er eit bevis på at vi vel livet over apartheid og rasisme, held han fram.

Provoserer israelske styrkar

Men det tek ikkje lang tid før protestane får ein annan tone. Væpna militære styrker stenger av trafikken rundt rundkøyringa.

Området blir merkt «lukka militær sone».

Demonstrantane blir tvinga til å forlate området. Om dei ikkje følger ordrane, kjem trugslar om vald og arrestasjon.

– Eksempelet med Palestina viser at svaret på ikkjevald ofte er vald, seier Sami Awad.

Sami Awad er direktør i Nonviolence International, ein organisasjon som onkelen hans grunnla etter at han blei utvist frå Palestina av israelske styrkar.

Han forklarer at det ofte ikkje handlar om ein brukar vald eller ikkje, men handlar om å vise motstand og å stå opp mot urett. Det er det som gjer slike initiativ så mektige, sjølv om dei aldri svarar med vald.

Nonviolence International gjev kurs til folk som ynskjer å vise motstand mot Israel utan å bruke vald, også til medlemmar i Combatants for Peace.

Awad peikar på at CFP er ei plattform der israelarar kan vise misnøya si med den israelske okkupasjonen på Vestbreidda.

Som for eksempel gjennom den vesle protesten i rundkøyringa i Betlehem.

Denne gongen, som dei fleste gongar, blir dei tvinga til å avslutte demonstrasjonane. Med tungt væpna militært personell får dei beskjed om at dei ikkje får lov å stogge opp medan dei forlèt rundkøyringa.

Men neste fredag kjem dei att til den same rundkøyringa med den same beskjeden.

Interessert i å følge med på det som skjer i verda? Høyr podkasten til utanriksredaksjonen, då vel: